رووداو دیجیتاڵ
گەورە راوێژکاری سەرۆککۆماری تورکیا رایگەیاند، ئەوانەی دەڵێن "نابێت سەردانی ئیمراڵی بکرێت" دەیانەوێت پرۆسەی "تورکیای بێ تیرۆر شکست بهێنێت" و دەڵێ، بۆ سەرکەوتنی ئەم دەستپێشخەرییە مێژووییە، پێویستە هەموو کەسێک بەرپرسیارێتی هەڵبگرێت.
ئایهان ئۆغان، گەورە راوێژکاری سەرۆککۆماری تورکیا درەنگی شەوی پێنجشەممە، 6ی تشرینی دووەمی 2025 لە تۆڕی کۆمەڵایەتیی ئێکس سەبارەت بە ئەگەری سەردانی ئەندامانی کۆمیسیۆنی پرۆسەی چارەسەری بۆ ئیمڕاڵی، پەیامێکی بڵاوکردەوە.
ئایهان دۆغان نووسیویەتی: "گوتنی 'نابێت سەردانی ئیمراڵی بکرێت' بە واتای ئەوە دێت کە قۆناخی گواستنەوە بۆ تورکیایەکی بێ تیرۆر شکست بهێنێت".
راوێژکارەکەی ئەردۆغان باسی دەستپێکردنی پرۆسەی نوێی چارەسەری کرد و گوتی: "لە ئەنجامی ئەو گوتارەی سەرۆککۆمارمان لە 1ی تشرینی یەکەم لە کردنەوەی پەرلەماندا پێشکێشی کرد و جەختی لەسەر بەرەی ناوخۆ کردەوە، هەروەها لە ئەنجامی دەستپێشخەرییە چاوەڕواننەکراوەکانی بەڕێز دەوڵەت باخچەلی و ئەو راگەیێندراوەی کە لەلایەن ئۆجەلان، رێبەری دامەزرێنەری رێکخراوی تیرۆریستیی جوداخوازەوە بڵاوکرایەوە، قۆناخی گواستنەوە بۆ تورکیایەکی بێ تیرۆر دەستیپێکرد."
ئۆغان باسی لەوە کرد، لە ئەنجامی بانگەوازەکەی ئۆجەلان، پەکەکە کۆنگرەی خۆی بەستووە و خۆی هەڵوەشاندووەتەوە، وازی لە شێوازی خەباتی چەکداری هێناوە و پرۆسەی لەناوبردنی چەکەکانی دەستپێکردووە. "رێکخراو و رێبەری دامەزرێنەری، رایانگەیاندووە کە داوای ستاتۆ و جیابوونەوەیان نییە؛ ئامادەن بۆ یەکگرتن لەگەڵ دەوڵەتی کۆماری تورکیا دا."
گەورە راوێژکارەکەی ئەردۆغان پێیوایە قۆناخی یەکەمی پرۆسەکە بە ئۆجەلان تەواو دەکرێت و دەڵێت: "قۆناخی یەکەم و ئامانجی گواستنەوە بۆ پرۆسەی تورکیای بێ تیرۆر؛ پاکتاوکردنی رێکخراو و پێکهاتە پاڵپشتەکانی، لەناوبردنی چەکەکان و گرتنەبەری رێوشوێنی یاسایی پێویستە، بۆ یەکگرتنەوەی ئەندام و لایەنگرانی. بۆ تەواوکردنی قۆناخی یەکەم، تاکە لایەنی پەیوەندیدار رێکخراو و ئۆجەلانی دامەزرێنەر و رێبەریەتی."
ئۆغان، جەختی لەوە کردەوە کە دەبێت بۆ تەواوکردنی پرۆسەکە گوێ لە رێبەری پەکەکەش بگیرێت و گوتی: "بێگومان بۆ تێپەڕاندنی قۆناخی یەکەم، گوێ لە رێبەری رێکخراوەکە دەگیرێت. ئەمە بە واتای بە شەرعیکردنی رێبەری رێکخراوەکە یان قبووڵکردنی وەکو نوێنەری کورد نایەت. لە کاتێکدا لیژنەی پەرلەمان رای هەموو لایەنە پەیوەندیدارەکانی وەرگرتووە، وەرگرتنی رای ئەو رێبەرەی رێکخراوەکەی هەڵوەشاندووەتەوە و فەرمانی لەناوبردنی چەکەکانی داوە، دەبێتە هەنگاوێکی زۆر ئاسایی و دروست."
راوێژکارەکەی ئەردۆغان وەڵامی رەخنەکانی سەر پرۆسەکەی داوەتەوە نووسی: "گوتنی 'نابێت سەردانی ئیمراڵی بکرێت' بە واتای ئەوە دێت کە قۆناخی گواستنەوە بۆ تورکیایەکی بێ تیرۆر شکست بهێنێت. واتای ئەوەیە دامەزراوەکانی دەوڵەت و ئەو بەڕێوەبەرانەی ئەم پرۆسەیە بەڕێوەدەبەن شکست بهێنن. واتای ئەوەیە بەڕێز دەوڵەت باخچەلی و سەرۆککۆمار ئەردۆغان کە پاڵپشتی ئەم پرۆسەیە دەکەن، شکست بهێنن."
هەندێک لایەن دژی ئەوەن ئەندامانی ئەو کۆمسیۆنەی لە پەرلەمان بۆ پرۆسەی چارەسەری پێکهێنراوە، سەردانی ئۆجەلان بکەن. ئۆغان لەو بارەیەوە دەڵێت: "ئەمە بە ئاشکرا بە واتای هەڵوێستوەرگرتنێکی دژ بە تورکیا دێت."
ئۆغان، لە کۆتایی گوتارەکەیدا جارێکی دیکە سەرنجی خستە سەر گرنگیی پرۆسەکە و گوتی: "بۆ سەرکەوتنی ئەم دەستپێشخەرییە کە گەورەترین و بەو ئەندازەیە گرنگترین دەستپێشخەریی مێژووی کۆمارە، پێویستە هەموو کەسێک دەست و جەستەی بخاتە ژێر بەردەوە."
