رووداو دیجیتاڵ
لە تورکیا، ژمارەی ئۆتۆمبێلی کارەبایی فرۆشراو لە ساڵی 2025 بەراورد بە ساڵی 2024 بە رێژەی 82.3% زیادیکردووە و گەیشتووەتە 191 هەزار و 960 ئۆتۆمبێل. پشکی لە بازاڕدا 17.7% بووە.
بە گوێرەی داتاکانی کۆمەڵەی دابەشکارانی ئۆتۆمبێل و گواستنەوە (ODMD)، فرۆشی ئۆتۆمبێل لە ماوەی کانوونی دووەم تاوەکو کانوونی یەکەمی 2025، بەراورد بە هەمان ماوەی 2024، بە رێژەی 10.62% زیادیکردووە و گەیشتووەتە ملیۆنێک و 84 هەزار و 496 ئۆتۆمبێل. فرۆشی ئۆتۆمبێلی بارهەڵگری سووکیش بە رێژەی 9.97% بەرزبووەتەوە و گەیشتووەتە 283 هەزار و 904 ئۆتۆمبێل.
لەو ماوەیەدا، لە بازاڕی ئۆتۆمبێلی تورکیادا 509 هەزار و 217 ئۆتۆمبێلی بەنزین، 295 هەزار و 378 ئۆتۆمبێلی هایبرێد، 80 هەزار و 346 ئۆتۆمبێلی دیزڵ و 7 هەزار و 595 ئۆتۆمبێلی ئۆتۆگاز فرۆشراون. فرۆشی ئۆتۆمبێلی تەواو کارەباییش 189 هەزار و 868 ئۆتۆمبێل بووە.
کاتێک ئەو ئۆتۆمبێلانەش دەخرێنە سەر کە سیستمی "مەودای درێژکراوە"یان هەیە (واتە مۆلیدەیەکی بەنزین پاترییەکە شەحن دەکاتەوە و بزووێنەرە کارەباییەکە ئۆتۆمبێلەکە دەبات بەڕێوە)، ژمارەی فرۆشی ئۆتۆمبێلی کارەبایی لە 2025دا بۆ 191 هەزار و 960 بەرزبووەتەوە، کە دەکاتە 17.7%ی پشکی بازاڕ.
لە کانوونی دووەم- کانوونی یەکەمی 2025، فرۆشی ئۆتۆمبێلی بەنزین بە رێژەی 13.9% و هی دیزڵ بە رێژەی 16.3% دابەزیوە. لە هەمان ماوەدا، فرۆشی ئۆتۆمبێلی ئۆتۆگاز بە رێژەی 27.6%، ئۆتۆمبێلی هایبرێد بە رێژەی 62.7% و ئۆتۆمبێلی تەواو کارەبایی بە رێژەی 90.8% زیادیکردووە.
هۆکاری سەرەکیی کەمبوونەوەی فرۆشی ئۆتۆمبێلی دیزڵ بۆ ئەوە دەگەڕێتەوە کە کۆمپانیا جیهانییەکان بەردەوامن لە راگرتنی بەرهەمهێنانی ئۆتۆمبێلی دیزڵ و بەم هۆیەشەوە ئۆتۆمبێلی نوێی دیزڵ ناخرێتە بازاڕەوە.
پشکی ئۆتۆمبێلی بەنزین لە کۆی فرۆشدا لە 60.3%ی ساڵی 2024ەوە بۆ 47% لە ساڵی 2025 دابەزیوە. لە هەمان ماوەدا، پشکی ئۆتۆمبێلی دیزڵ لە 9.8%ـەوە بۆ 7.4% کەمیکردووە و پشکی ئۆتۆمبێلی ئۆتۆگازیش 0.7% بووە.
هاوکات، پشکی ئۆتۆمبێلی تەواو کارەبایی لە کۆی فرۆشدا لە 10.1%ەوە بۆ 17.5% و هی هایبرید لە 18.5%ەوە بۆ 27.2% بەرزبووەتەوە.
کاتێک ئۆتۆمبێلە تەواو کارەباییەکان، ئەوانەی مەودای درێژکراوەیان هەیە و هایبرێدەکان پێکەوە هەژمار دەکرێن، دەبینرێت کە 44.9%ی کۆی بازاڕ پێکدەهێنن و کۆی فرۆشیان گەیشتووەتە 487 هەزار و 338 ئۆتۆمبێل. بەمەش، لە هەر 10 ئۆتۆمبێلێکی فرۆشراو لە تورکیا، 4یان کارەبایی یان هایبرێد بوون.
لە مانگی کانوونی یەکەمی 2025دا، 25 هەزار و 203 ئۆتۆمبێلی "تەواو کارەبایی" فرۆشراون، کە پشکیان لە بازاڕی ئەو مانگەدا 17.2% بووە. هەر لەو مانگەدا، 43 هەزار و 386 ئۆتۆمبێلی هایبرێد فرۆشراون و پشکیان لە بازاڕدا 29.7% بووە.
.webp&w=3840&q=75)
