تووتییەک ژیانی خاوەنەکەی لە مردن رزگاردەکات

ئەنتۆن نگوین خاوەنی تووتییەکەیە و بەتەنیا دەژیت، شەوێک کاتێک خەوتبوو ئاگر لە ماڵەکەی بەردەبێت و تووتییەکەی دەست بە دەنگە دەنگ دەکات و لە خەو هەڵیدەستێنێت. ئەنتۆن لەبارەی ئەو شەوەوە دەڵێت، "من وەکو هەموو شەوێکی دیکە خەوتبووم، بەڵام لەناکاو دەنگە دەنگ و هاواری تووتییەکەم لە خەو هەڵیساندم".

کاتێک ئەنتۆن لە خەو هەڵدەستێت هەست بە بۆنی دووکەڵ دەکات، و دەستبەجێ ماڵەکە بەجێدەهێڵێت، ئەنتۆن دەڵێت، "زۆر سەیرە بەلامەوە کە لەو رووداوە رزگارم بوو و کاتێک هەستم بە دووکەڵ کرد یەکسەر ماڵەکەم بەجێهێشت، بەڵام تووتییەکەی هاوڕێمم بیر نەچوو و ئەویشم لەگەڵ خۆم برد".

هەرچەندە نیگوین ئامێری ئاگادارکردنەوەی ئاگری لە ماڵەکەی داناوە، بەڵام تووتییەکەی پێش ئامێرەکە لە خەو هەڵێدەستێنێت، و دەڵێت، "نازانم ئەگەر ئەو تووتییەم نەبووایە چیم بەسەردەهات".

تیمەکانی ئاگرکوژێنەوەی ویلایەتی کوینزلاند لەبارەی ئاگرەکەوە دەڵێن، کاتێک ئەوان گەیشتوون ماڵەکە بەتەواوی ئاگری گرتبوو و زیاتر لە کاژێرێکی خایاند بۆ کۆنتڕۆڵکردنی ئاگرەکە، تاوەکو ئێستاش هۆکاری ئاگرکەوتنەوەکە دیار نییە.