رووداو دیجیتاڵ
بەرەبەیانی رۆژی چوارشەممە 14ی حوزەیران، بەلەمێک کە نزیکەی 400 کۆچبەری تێدابوو، لە شاری تەبڕقی لیبیاوە بەڕێکەوت بەرەو ئیتاڵیا، بەڵام بە دووریی 47 کیلۆمەتر لە باشووری رۆژهەڵاتی هەرێمی پیۆپۆنیسی یۆنان، بەهۆی نالەباریی کەشەوە نقومبوو و تائێستا تەرمی زیاتر لە 80 کۆچبەر دۆزراونەتەوە.
گیانیس کارڤێڵس، سەرۆکی بنکەی تەندروستیی هەرێمی پیۆپۆنیس رایگەیاند، "ئێمە 104 کەسمان رزگار کردوون کە ئێستا لە کلاماتا لە شوێنی ئارامدان. پزیشک و پەرستارەکان سەرقاڵی چارەسەرکردنیانن. 21 لە کۆچبەرەکان گوازرانەوە نەخۆشخانە، چونکە تەندروستییان ناجێگیر بوو. چوار کەسیش بە سەختی بریندار ببوون، ناچار بووین بە کۆپتەر بیانگوازینەوە."
رێکخراوی خاچی سوور بە هانای رزگاربووانی رووداوەکە چووە و هیوا هەیە خەڵکی دیکەش رزگار بکەن.
کۆستانتینۆس ڤلاچۆ، خۆبەخش لە خاچی سوور ئاماژە بەوە دەکات، "ئەوان شڵەژاو دیاربوون. کێ شڵەژاو نابێت دوای ئەوەی بەلەمەکەیان نقووم بێت؟ هیوادارین خەڵکی زیاتر رزگار بکرێن."
لە ساڵی 2019دا 80,454 کۆچبەر گەیشتنە یۆنان، بە ئامارەکانەوە دیارە کە تاوەکو ساڵی 2023 ژمارەکان داکشاون، لە 2022دا بۆ 12,758 کۆچبەر دابەزیوە، لە سەرەتای ئەمساڵیشەوە تاوەکو ئێستا 6500 کۆچبەر گەیشتوونەتە یۆنان.
بەگوێرەی ئامارەکانی حکومەتی یۆنان، لە ساڵی 2022دا پۆلیسی وڵاتەکە رێگریی لە 256 هەزار کۆچبەری نایاسایی کردووە بچنە نێو خاکی وڵاتەکەی، هەروەها 1300 کەسی دیکەشیان دەستگیر کردووە کە قاچاخچی بوون.
بەلەمەکە لەنێو سنوورە ئاوییە نێودەوڵەتییەکان، بە دووریی 47 کیلۆمەتر لە باشووری رۆژهەڵاتی دوورگەی پیەپۆنیس، بەهۆی نالەباریی کەشوهەواوە، نقومبووە.
وەزارەتی کۆچ و کۆچبەرانی یۆنان بە میدیای وڵاتەی راگەیاندووە، سەتان کۆچبەر لەنێو بەلەمەکەدا بوون و "ترسمان هەیە لەوەی ژمارەیەکی زۆری کۆچبەرەکان لەنێو دەریادا بێسەروشوێن بووبن."
رێکخراوی کۆچی نێودەوڵەتی (IOM)، لە تویتێکدا ئاماژەی بەوە کردووە، ژمارەیەکی زۆری کۆچبەر لەنێو بەلەمەکەدا بێسەروشوێن بوون و "راپۆرتە سەرەتاییەکان ئەوە دەردەخەن کە زیاتر لە 400 کەس لەنێو بەلەمەکەدا بوون؛ ترسمان هەیە کە کۆچبەرێکی زیاتر گیانیان لەدەستدابێت."
پێشڕەو عەبدوڵڵا، نوێنەری کۆمەڵەی پەنابەرە گەڕاوەکان - یۆنان رۆژ 14ی حوزەیران لە بوولتەنی کۆڕۆژی تۆڕی میدیایی رووداو کە زانا کایانی و دڵدار هەرکی پێشکێشیان کرد، باسی ئەو بەلەمەی کرد کە نقومبوو و گوتی، "700 کەسی تێدابووە و بەشێکیان کوردی رۆژئاوای کوردستانن." ئاماژەی بەوەش کرد، "ئەم هاوینە پڕ لە مەئسات دەبێت بۆ کۆچبەران."
