لە چین فێستیڤاڵی نیوەپاییزە بەڕێوەدەچێت

لی شیاو رووی تەمەنی 17 ساڵە و قوتابییە، دەڵێت: "لەم ساڵانەی دواییدا بەشداریم لە هەندێک چالاکیی پەیوەست بە فێستیڤاڵی نێوەڕاستی پاییزدا کردووە. بۆ نموونە ساڵی رابردوو بەشداریم لە نمایشێکی رووناکی دا کرد لە مۆشیکۆ. ئەم ساڵ سەردانی بازاڕی کتێبم لە دیتان هەڵبژارد. لە فێستیڤاڵی نێوەڕاستی پاییز دا، کێکی مانگ دەخۆین. من زۆر حەزم لە پڕکردنەوەی کرێم و پڕکردنەوەی هەویرەی فاسۆلیایە. ئەم دوو پڕکردنەوە هەردووکیان پڕکردنەوەیەکی زۆر نەریتین بۆ کێکی مانگی فێستیڤاڵی نێوەڕاستی پاییز. خێزانەکەمان بەزۆری کێکی مانگ دەکڕن."

فانۆسی سوور و رەنگین، خواردن و گۆڕینەوەی کێک لەشێوەی مانگ نەریتی سەرەکیی فێستیڤاڵەکەن، ئەو کێکە پارساڵ زیاتر لە دوو ملیار و 300 ملیۆن دۆلار داهاتی هەبووە. 

جێف ژانگ، بەڕێوەبەری دارایی فێستیڤاڵەکە دەڵێت: "فێستیڤاڵی ساڵانەی نێوەڕاستی پاییز واتا کۆبوونەوەی خێزانی، کە 15ـەمین رۆژی هەشتەمین مانگە لە ساڵنامەی نەریتیی چینیدا. لەم رۆژەدا خێزانەکان کۆدەبنەوە. کێکی مانگ واتا یەکگرتنەوە، تامێکی زۆر خۆشی هەیە و زۆر بە تام و چێژە. ئێمە هەمیشە وەک خێزان پێکەوە کۆدەبینەوە بۆ ئاهەنگگێڕان. هەروەها لە ماڵەوە هەندێک کێکی مانگ دروست دەکەین. بۆ نموونە دایکم دەتوانێت کێکی مانگ دروست بکات. ئەو لە قاڵبی کێکی مانگ بەکاردەهێنێت بۆ نەخشاندنی نەخشەکانی سەر کێکەکان. بێگومان لە دەرەوەش دەیانکڕین. هاوکات، دەبێت هاوڕێکانیشمان کێکی مانگمان بۆ بنێرن."

سەرەڕای کورتیی پشووەکە، تەنیا یەکەم رۆژ زیاتر لە 215 ملیۆن کەس گەشتیان لە نێوخۆی وڵاتەکە دا کردووە بۆ ئەوەی سەردانی کەسوکار و ئازیزانیان بکەن. 

لین جو هوی، دەرهێنەرە و دەڵێت: "ئەم فێستیڤاڵە نێوەڕاستی پاییزە، بە شێوەیەکی سەرەکی لەگەڵ هاوڕێکانم دەمێنمەوە. کێکی مانگ هاوبەش دەکەین. لەبەرئەوەی ئێمەی گەنجان بەهۆی ئەوەی لە دەرەوەی شار کاردەکەین، ناتوانین بگەڕێینەوە ماڵەوە بۆ بەسەربردنی کاتێکی خۆش لە فێستیڤاڵەکە. هەموومان فێستیڤاڵی نێوەڕاستی پاییز بەشێوەی جیاواز پێکەوە بەسەر دەبەین. من و هاوڕێکانم بەشێوەیەکی سەرەکی ئەمڕۆ هاتینە بازاڕی کتێبی دیتان." 

مێژووی فێستیڤاڵی نیوەپاییزە بۆ زیاتر لە سێ هەزار ساڵ دەگەڕێتەوە، کشتوکاڵی کۆن، مانگ پەرستی و وەرزی دروێنە و خەرمان هەوێنی دروستبوونی فێستیڤاڵەکەن.

جگە لە چین لە نزیکەی 10 ولات و هەرێمی دیکە ئاهەنگی ئەم فێستیڤاڵە دەگێڕن.

ئەم فێستیڤاڵە پەیوەستە بە چیرۆکی ئەفسانەیی چانگێ، خوداوەندی مانگ، کە لەگەڵ کەروێشکێک لەسەر رووی مانگ دەژی. چینیەکان ئەفسانەکانیان کردووە بە راستی و تائێستا شەش کەشتیی چانگێیان رەوانەی سەر مانگ کردووە.