رووداو دیجیتاڵ
پۆلیسی ئەسیوپیا دەڵێت، پاسێک لە باکووری وڵاتەکە وەرگەڕاوە و بەهۆیەوە 25 کەس گیانیان لەدەستداوە.
رووداوەکە رۆژی پێنجشەممە 23-01-2025، لە ناوچەی داونت لە هەرێمی ئەمهارای باکووری ئەسیوپیا روویداوە، 14 کەسیش بە سەختی برینداربوون و رەوانەی نەخۆشخانە کراون.
ئەسیوپیا دووەم گەورەترین وڵاتی ئەفریقایە لە رووی دانیشتووانەوە و ساڵانە ژمارەیەکی زۆر رووداوی هاتووچۆی لێ روودەدات. بەشێکی زۆری هۆکارەکەش بەهۆی خراپیی رێگەوبانی وڵاتەکەوەیە.
رۆژی 30-12-2024، بارهەڵگرێک کە بەشداربووانی ئاهەنگێکی هاوسەرگیری دەگواستەوە، کەوتە نێو رووبارێک و بەهۆیەوە 71 کەس گیانیان لەدەستدا.
سەرەتای 2024، پاسێک لە باشووری ئەسیۆپیا کەوتە نێو رووبارێک، لانیکەم 28 کەس گیانیان لەدەستدا و 19ـی دیکەش بەسەختی برینداربوون.
لە ساڵی 2018 لە باکووری وڵاتەکە، بارهەڵگرێکی سوپا خۆی بە پاسێکی بچووکدا کێشا و 18 کەس گیانیان لەدەستدا.
بەگوێرەی راپۆرتێکی رێکخراوی تەندروستیی جیهانی، کیشوەری ئەفریقا 4٪ـی هەموو ئۆتۆمبێلەکانی جیهانی لێیە و ساڵی پار 19٪ـی مردن بەهۆی رووداوی هاتووچۆ لەو کیشوەرە بووە.
