رووداو دیجیتاڵ
لە باشووری ئەڵمانیا ژنێک بە چەقۆ هێرشی کردە سەر خەڵک و چەند کەسێکی بریندارکرد. پۆلیس تەقەی لە ژنەکە کردووە و لە نەخۆشخانە گیانی لەدەستداوە.
رۆژی شەممە 07-06-2025، ژنێک لە شاری میونشن لە هەرێمی باڤاریای باشووری ئەڵمانیا بە چەقۆ هێرشی کردە سەر خەڵک. بەگوێرەی میدیای ئەڵمانیا، کەمتر لە 10 کەس لە رووداوەکە برینداربوون و پۆلیسیش تەقەی لە ژنەکە کردووە و برینداری کردووە.
ژنەکە دوای گواستنەوەی بۆ نەخۆشخانە، گیانی لەدەستدا.
میدیای ئەڵمانیا رایگەیاند، ژنەکە تەمەنی 30 ساڵە، هێشتا رەچەڵەکی نەزانراوە و دیاریش نییە هۆکار و پاڵنەری ئەو رووداوە چییە.
پێش چەند کاژێرێک لەو رووداوە، هەر لە باڤاریا و لە شاری پاساو، پیاوێکی عێراقی بە ئۆتۆمبێل خۆی بەنێو کۆمەڵێک خەڵکدا کرد و پێنج کەسی بریندارکرد.
بەگوتەی پۆلیس، پیاوەکە تەمەنی 48 ساڵە و دەستگیرکراوە، دوای جیابوونەوە لەگەڵ هاوژینەکەی کێشەی هەبووە لەسەر ئەوەی کامیان منداڵە پێنج ساڵەکەیان لەخۆ بگرن، دوای ئەوەی هاوژینەکەی لەو شوێنە بینیوە بە ئۆتۆمبێل بۆی چووە. لە رووداوەکە، هاوژین و کچەکەشی برینداربوون.
.jpg&w=3840&q=75)