رووداو دیجیتاڵ
چوار دەزگای راگەیاندنی جیهانی هۆشداری لە برسێتی رۆژنامەڤانەکانیان و کەسوکاریان لە کەرتی غەززە دەدەن و دەڵێن، پێویستە ئیسرائیل رێگە بە گەیاندنی هاوکاری مرۆیی بە تەواوی غەززەییەکان و رۆژنامەڤانەکانیان بدات.
رۆژی پێنجشەممە، 24ی تەممووزی 2025، ئاژانسی ئەی ئێف پی فەرەنسی، ئەی پی ئەمریکی و بی بی سی و رۆیتەرزی بەریتانی راگەیێندراوێکی هاوبەشیان لەسەر دۆخی مرۆیی غەززە و رۆژنامەڤانانیان لەو کەرتە بڵاوکردەوە.
راگەیێندراوەکەدا هاتووە، "زۆر نیگەرانی رۆژنامەڤانەکانمانین لە غەززە کە ناتوانن خۆراکی پێویستیان بۆ خۆیان و خێزانەکانیان دەستکەوێت". دەشڵێن، "چەند مانگێکە، ئەو رۆژنامەڤانە سەربەخۆیانە چاو و گوێی جیهان بوونە لە غەززە و ئێستاش رووبەڕووی هەمان ئەو چارەنووسە بوونەتەوە کە رووماڵی دەکەن".
لە راگەیێندراوەکەی ئەو چوار دەزگا راگەیاندنەدا ئاماژە بەوەش کراوە، "رۆژنامەڤانان بەرگەی نەبوونی و قورسیی زۆریان گرتووە لە ناوچەکانی جەنگدا. ئاگاداری ئەو هەڕەشەی برسێتییەین کە ئێستا لەسەریانە".
ئەو راگەیێندراوەی چوار دەزگا راگەیاندنەکە لە کاتێکدایە بە گوێرەی تەندروستیی غەززە، لە سەرەتای جەنگەوە لانیکەم 101 هاووڵاتیی لە کەرتەکە بەهۆی برسێتی و کەم خۆراکییەوە مردوون.
لە کۆتایی راگەیێندراوەکەی چوار دەزگاکەدا ئەوەش هاتووە، "جارێکی دیکە داوا لە بەرپرسانی ئیسرائیل دەکەین رێگە بە رۆژنامەڤانان بدات بچنە نێو غەززە و بڕۆنە دەرەوە". هەروەها، "گرنگە خۆراکی پێویست بگاتە خەڵکی کەرتەکە".
لە 2ی ئادار تاوەکو 19ی ئایار، 78 رۆژ ئیسرائیل هەموو سنوورەکانی غەززەی داخست. دواتر، رێگەی بە چوونی کەمێک خۆراک دا کە 30 ئۆتۆمبێلی بارهەڵگر بوو لە رۆژێكدا، لە کاتێکدا پێشتر رۆژانە 600 بارهەڵگر بوو.
ئەو ئامارانە لە کاتێکدان بە گوێرەی نەتەوە یەکگرتووەکان، لە 2.2 دانیشتووی کەرتی غەززە لانیکەم 96٪یان برسین و 33٪یان لە برسێتیی توونددان.
