رووداو دیجیتاڵ
ژمارەی ئەو کەسانەی لە رووداوی وەرگەڕانی پاسێکی گەشتیاری لە ویلایەتی نیویۆرکی ئەمریکا گیانیان لەدەستدا، بۆ 5 کەس بەرزبووەوە، ئەوەش دوای ئەوەی پۆلیس رایگەیاند کە شۆفێری پاسەکە "سەرنجی تێکچووە."
رۆژی شەممە 23-08-2025 پۆلیسی ویلایەتی نیویۆرک رایگەیاند، رووداوەکە رۆژی هەینی روویداوە کاتێک پاسەکە بە 54 سەرنشینەوە لە تاڤگەکانی نیاگاراوە دەگەڕایەوە بۆ شاری نیویۆرک، لەسەر رێگەیەکی خێرا لە کۆنترۆڵ دەرچووە و وەرگەڕاوە.
ئاندرێ رەی، بەڕێوەبەری پۆلیسی نیویۆرک، رۆژی هەینی لە شوێنی رووداوەکە رایگەیاند: "پێمان وایە شۆفێرەکە سەرنجی تێکچووە، کۆنترۆڵی لەدەستداوە، هەوڵی داوە دۆخەکە راستبکاتەوە و لە کۆتاییدا لەوێ وەستاوە." رەی گوتی، پێنج کەس گیانیان لەدەستداوە.
ئەمە لە کاتێکدایە کە سەرەتا گوتەبێژێکی پۆلیس رایگەیاند، "پاسەکە بە هۆکارێکی نادیار لە کۆنترۆڵ دەرچووە، خۆی بە بەربەستی نێوەڕاستی رێگەکەدا کێشاوە و لە کۆتاییدا لە جۆگەیەکدا وەستاوە."
سەرنشینەکان خەڵکی هیندستان، چین و فلیپین بوون. کۆنسووڵخانەی چین لە نیویۆرک رایگەیاند، 6 هاووڵاتیی چینی لەنێو پاسەکەدا بوون، پێنجیان بە سووکی بریندار بوون و نەخۆشخانەیان جێهێشتووە، لە کاتێکدا شەشەمیان نەشتەرگەری بۆ دەکرێت.
پۆلیس جەختی کردەوە کە "هەڵەی میکانیکی و سەرخۆشی یان بەکارهێنانی مادەی هۆشبەر رەتکراونەتەوە" و تاوەکو ئێستا هیچ تۆمەتێک ئاراستەی شۆفێرەکە نەکراوە.
لە راگەیێندراوەکەدا پۆلیس ئاماژەی بەوە کرد، هیچ منداڵێک لە رووداوەکەدا گیانی لەدەستنەداوە، ئەمەش پێچەوانەی زانیارییە سەرەتاییەکان بوو کە باس لە گیانلەدەستدانی منداڵێک دەکرد.
8 هێلیکۆپتەر بەشدارییان لە هەوڵی رزگارکردندا کرد و تۆڕی بەخشینی خوێن و ئەندامەکانی جەستە داوای لە خەڵک کردووە خوێن ببەخشن.
