رووداو دیجیتاڵ
کییەر ستامەر، سەرۆکوەزیرانی بەریتانیا لە پەیامێکی ڤیدیۆییدا رایگەیاند، حکومەتی وڵاتەکەی دانی بە دەوڵەتی فەلەستیندا نا. ستامەر داوای لە ئیسرائیل کرد، تووندوتیژییەکان رابگرێ.
رۆژی یەکشەممە 21-09-2025 ستامەر لە لەندەنەوە رایگەیاند: "ئەمڕۆ بۆ زیندووکردنەوەی هیوای ئاشتی و چارەسەری دوو دەوڵەتی، بە روونی رایدەگەیەنم، وەک سەرۆکوەزیرانی ئەم وڵاتە مەزنە، شانشینی یەکگرتوو بە فەرمی دان بە دەوڵەتی فەلەستیندا دەنێم."
سەرۆکوەزیرانی بەریتانیا گوتی: "بەهۆی ئەو ترسە زیادبووەی لە رۆژهەڵاتی نێوەڕاست هەیە، کار بۆ هێشتنەوەی ئەگەری ئاشتی و چارەسەری دوو دەوڵەت دەکەین، ئەمەش واتە ئیسرائیلێکی سەقامگیر و دەوڵەتێکی فەلەستین کە ئێستا هیچ کامیانمان نییە."
ستامەر رایگەیاند، لەگەڵ خێزانی ئەو بارمتە بەریتانییانە کۆبووەتەوە کە حەماس رفاندنی و گوتی: "هەموو رۆژێک ئەو ئەشکەنجەیە دەبینم کە ئەوان پێیدا دەڕۆن. هەموو رۆژێک ئەو ئازارە دەبینم کە رێک لە دڵی خەڵکی ئیسرائیل و بەریتانیا دەچەقێت."
سەرۆکوەزیرانی بەریتانیا گوتی: "مەرجە دەستبەجێ بارمتەکان ئازاد بکرێن و شەڕیش بۆ گەڕاندنەوەیان بۆ نیشتمان دەکەین."
ستامەر ئاماژەی بەوەشدا: "بانگەوازی ئێمە بۆ چارەسەری دوو دەوڵەتی، رێک پێچەوانەی دیدگە پڕ رقەکەی حەماسە. ئەو چارەسەرە پاداشتێک نییە بۆ حەماس، چونکە بە مانای ئەوە دێ کە حەماس هیچ داهاتوویەک و رۆڵێکی لە حکومەت و ئاسایشدا نابێت."
دوای راگەیاندنی داننان بە فەلەستین، ستامەر باسی دۆخی نێو غەززەی کرد و گوتی: "ئەو قاتوقڕی و تۆقینە بە هیچ شێوەیەک جێگەی قبووڵکردن نییە. دەیان هەزار کەس کوژراون، لەوانەش ئەو کەسانەی لە کاتی وەرگرتنی خۆراک و ئاو کوژراون. ئەم مەرگ و خاپوورکردنە، هەموومان دەتۆقێنێ."
ستامەر داوای لە ئیسرائیل کرد: "ئەو سنووردارکردنە هەڵبگرە و واز لەو تاکتیکە خراپانە بهێنە، لێگەڕێ هاوکارییەکان بچنە ژوورەوە."
جگە لە بەریتانیا، هەر ئەمڕۆ حکومەتەکانی ئوسترالیا و کەنەدا دانیان بە دەوڵەتی فەلەستیندا نا و پۆرتوگالیش بەنیازە بە فەرمی دانی پێدا بنێت.
