رووداو دیجیتاڵ
دۆناڵد ترەمپ، سەرۆکی ئەمریکا رایگەیاند، پەیوەندییەکی تەلەفۆنیی "زۆر بەرهەمداری" لەگەڵ ڤلادیمیر پووتین، سەرۆکی رووسیا کردووە، رێککەوتوون بۆ کۆتاییهێنان بە جەنگی ئۆکراینا، لە بوداپێستی پایتەختی هەنگاریا کۆببنەوە. کۆشکی سپیش پشتڕاستی کردەوە کە هەردوو سەرۆک لەسەر کۆبوونەوەی شاندێکی باڵا لە هەفتەی داهاتوودا رێککەوتوون.
دۆناڵد ترەمپ لە پۆستێکدا لە تۆڕی کۆمەڵایەتیی ترووس سۆشیاڵ رایگەیاند: "تازە پەیوەندییە تەلەفۆنییەکەم لەگەڵ سەرۆک ڤلادیمیر پووتینی رووسیا کۆتایی پێهێنا و یەکجار بەرهەمدار بوو. بۆ ئەو دەستکەوتە گەورەیەی [بەدیهێنانی] ئاشتی لە رۆژهەڵاتی نێوەڕاست، سەرۆک پووتین پیرۆزبایی لێکردم، کە وەک خۆی گوتی، چەندین سەدەیە خەونی پێوە دەبینرێت."
ترەمپ نووسی: "من لەو باوەڕەدام کە سەرکەوتن لە رۆژهەڵاتی نێوەڕاستدا یارمەتیدەرمان دەبێت لە گفتوگۆکانماندا بۆ گەیشتن بە کۆتاییهێنانی جەنگ لەگەڵ رووسیا/ئۆکراینا."
سەرۆکی ئەمریکا ئاماژەی بەوەشکرد، پووتین سوپاسی میلانیا ترەمپی خانمی یەکەمی کردووە بۆ کارەکانی لەگەڵ منداڵان و باسیان لە بازرگانیی نێوان رووسیا و ئەمریکا کردووە دوای کۆتاییهاتنی جەنگی ئۆکراینا.
ترەمپ پلانی داهاتووی ئاشکرا کرد و گوتی: "لە کۆتایی پەیوەندییەکەدا، رێککەوتین کە هەفتەی داهاتوو کۆبوونەوەیەک لەنێوان راوێژکارە باڵاکانماندا بکرێت." بە گوتەی ترەمپ، کۆبوونەوە سەرەتاییەکانی ئەمریکا لەلایەن مارکۆ روبیۆ، وەزیری دەرەوەوە سەرپەرشتی دەکرێت.
سەرۆکی ئەمریکا لەبارەی کۆبوونەوەی لووتکەوە رایگەیاند: "دواتر من و سەرۆک پووتین لە بوداپێستی هەنگاریا، کۆدەبینەوە بۆ ئەوەی بزانین دەتوانین کۆتایی بەم جەنگە نابووتەی نێوان رووسیا و ئۆکراینا بهێنین."
هەروەها ترەمپ ئاشکرایکرد کە سبەی کۆبوونەوەیەکی دیکەی گرنگی هەیە و گوتی: "سبەی من و سەرۆک زیلینسکی لە کۆشکی سپی کۆدەبینەوە، کە تێیدا باس لە پەیوەندییەکەم لەگەڵ سەرۆک پووتین و زۆر شتی دیکە دەکەین."
هاوکات، کۆشکی سپی لە راگەیێنراوێکدا پشتڕاستی کردەوە کە ترەمپ و پووتین لەسەر کۆبوونەوەیەکی ئاستبەرزی نێوان هەردوولا لە هەفتەی داهاتوودا رێککەوتوون.
کۆشکی سپی رایگەیاند، رەنگە دوای ئەو کۆبوونەوە ئاستبەرەزە، کۆبوونەوەیەکی دیکەی لووتکە لەنێوان ترەمپ و پووتیندا بکرێت.
بەپێی راگەیێنراوەکە، "سەرۆک ترەمپ هێشتا لەو باوەڕەدایە کە ئەگەری لووتکەیەک هەیە کە پووتین و زیلینسکی پێکەوە کۆبکاتەوە" و جەختیشی کردەوە کە "سەرۆک پووتین پابەندە بە کۆبوونەوە لەگەڵ ترەمپ."
