رووداو دیجیتاڵ
بڕیارە رووسیا رۆژی 24ی تشرینی دووەم میوانداریی یەکەمین فێستیڤاڵی فیلمی (پەپوولەی ئەڵماسی) بکات، کە بە گوتەی رێکخەرانی، ئامانج لێی تیشکخستنە سەر بەرهەمی ئەو هونەرمەندانەیە کە رەگ و ریشەی لە بەها رۆحی و کولتوورییە قووڵەکانی یۆرۆئاسیادایە.
فێستیڤاڵەکە لەلایەن وەزارەتی رۆشنبیریی رووسیاوە بە هاوبەشی دامەزراوەی کولتووریی رووسیا دامەزراوە و وەکو دەستپێشخەرییەکی کولتووریی نێودەوڵەتی ناسێندراوە.
ئەم پڕۆژەیە هەوڵ دەدات پەرە بەو فیلمانە بدات کە رەنگدانەوەی بەها ئەخلاقییەکان، شوناسی نیشتمانی و فرەچەشنیی کولتوورین.
بەپێی راگەیێندراوی فەرمی، ئەم فێستیڤاڵە بەتایبەتی بۆ پشتگیریکردنی ئەو سینەماکارانە داڕێژراوە کە لە رێگەی بەرهەمەکانیانەوە کار لەسەر پاراستنی میراتی کولتووری و مێژوویی ناوچەکە دەکەن.
بە گوتەی رێکخەرانی، فێستیڤاڵی 'پەپوولەی ئەڵماسی' وەک "پلاتفۆرمێکی داهێنەرانە بۆ پشتگیریکردنی سینەمای نووسەر" کاردەکات و دیالۆگی نێوان نەتەوەکان لە رێگەی هونەرەوە بەهێز دەکات.
فێستیڤاڵەکە جەخت لەسەر ئەو بەرهەمانە دەکاتەوە کە یارمەتیدەرن لە یەکخستنی خەڵک، پتەوکردنی پەیوەندییە مرۆییەکان و هاندانی تێگەیشتنی قووڵتری کۆمەڵایەتی. ئامانج ئەوەیە کە فیلمەکان ببنە پردێکی پەیوەندی بۆ لێکتێگەیشتنی زیاتر لەنێوان گەلانی جیاوازی یۆرۆئاسیادا.
پێشبینی دەکرێ رێوڕەسمەکە لە مۆسکۆ سینەماکاران، هونەرمەندان، رەخنەگران و کەسایەتییە کولتوورییەکان لە سەرانسەری یۆرۆئاسیا، لە ئەورووپای رۆژهەڵاتەوە تاوەکو ئاسیای ناوەڕاست، کۆبکاتەوە.
