رووداو دیجیتاڵ
ژیریی دەستکرد و چاتبۆتەکان چیتر تەنیا بۆ کات بەسەربردن نین، بەڵکو ئێستا کاریگەریی گەورەیان لەسەر ژیانی خەڵک هەیە و تەنانەت دەبنە هۆی جیابوونەوەی هاوژینەکان.
پرسیارە سەرەکییەکە: ئایا پەیوەندی لەگەڵ ژیریی دەستکرد بە "ناپاکی" دادەنرێت؟
بە گوێرەی راپۆرتێکی گۆڤاری Wiredی ئەمریکی، ئێستا ئەمە بووەتە کێشەیەکی گەورە لە یاسای ژیانی هاوژینیدا.
چونکە زیاتر و زیاتر خەڵک سکاڵا دەکەن و داوای جیابوونەوە لە هاوژینەکانیان دەکەن، بە بیانووی ئەوەی هاوژینەکانیان پەیوەندیی سۆزدارییان لەگەڵ چاتبۆتەکاندا دروست کردووە.
رێبیکا پالمەر، پارێزەری بواری جیابوونەوە دەڵێت: "یاسا هێشتا تازە خەریکە خۆی لەگەڵ ئەم بابەتە نوێیانەدا دەگونجێنێت، بەڵام هەندێک کەس وا سەیری ئەم پەیوەندییە دەکەن کە راستەقینەیە و هەندێکجار لە پەیوەندی لەگەڵ مرۆڤێکیش باشترە."
نموونەی راستەقینە
یەکێک لە پارێزەران باسی دۆسیەیەکی کرد کە تێیدا هاوژینێک نەک هەر پارەیەکی زۆری لە چاتبۆتێک خەرج کردووە، بەڵکو زانیاریی زۆر تایبەت و هەستیاری وەک ژمارەی هەژماری بانکی و ژمارەی بیمەی کۆمەڵایەتیی خۆیشی پێداوە.
ئەم دۆخە دادوەرەکانی تووشی سەرئێشە کردووە، چونکە ئەوان خۆیان کێشەیان لەگەڵ دۆسیەی ناپاکیی نێوان مرۆڤەکاندا هەیە و نازانن چۆن مامەڵە لەگەڵ ئەم جۆرە نوێیەی "ناپاکی" بکەن.
کێشەکە ئاڵۆزتر دەبێت
لە هەندێک ویلایەتی ئەمریکا، ناپاکیی هاوژینەکان تاوانێکی گەورەیە و سزای زیندانیکردن و پێبژاردنی لەسەرە.
پرسیاری دایکایەتی و باوکایەتی: ئایا دادوەر مافی بەخێوکردنی منداڵ دەداتە دایکێک یان باوکێک کە ئالوودەی قسەکردن و پەیوەندیی سۆزداری لەگەڵ چاتبۆتێک بووە؟ پارێزەران پێیانوایە دادوەر رەنگە گومان لە توانای ئەو کەسە بکات بۆ بەخێوکردنی منداڵ.
پێشبینیی داهاتوو
ئیلیزابێس یانگ، پارێزەرێکی دیکەی بواری خێزانە، پێشبینی دەکات ژمارەی جیابوونەوەکان بەهۆی ژیریی دەستکردەوە زۆر زیاد بکات، هەروەک چۆن لە سەردەمی کۆرۆنادا جیابوونەوە زیادی کرد.
ئەو دەڵێت: "چەندە ژیریی دەستکرد لە راستییەوە نزیکتربێت، سۆزدارتر و هاودەردتر بێت، هێندەی دیکە ئەوانەی ژیانی هاوژینییان ناخۆشە، بۆ دۆزینەوەی خۆشەویستی پەنای بۆ دەبەن."
زانیارییەکان لە بەریتانیا دەریدەخەن پەیوەندیی سۆزداری لەگەڵ چاتبۆتەکاندا بووەتە هۆکارێکی باو لە دۆسیەکانی جیابوونەوەدا.
لە هەندێک ویلایەتی وەک ئۆهایۆ هەوڵدەدەن یاسا دەربکەن بۆ قەدەخەکردنی ژیانی هاوژینیی نێوان مرۆڤ و ژیریی دەستکرد، چونکە پێیانوایە تەکنەلۆجیایەکە "بوونەوەرێکی بێهەستە" و کەسایەتیی یاسایی نییە.
