رووداو دیجیتاڵ
سوپای ئیسرائیل دەڵێ، هێرشی کردووەتە سەر "بنکەیەکی حەماس" لە باشووری لوبنان کە بۆ راهێنان و مەشق بەکارهێندراوە. لە بەرامبەردا لوبنان دەڵێ، هێرشەکەی ئیسرائیل بۆ سەر کەمپێکی پەنابەرانی فەڵەستینی لە باشووری وڵاتەکە بووە و لانیکەم 11 کەس کوژراون.
رۆژی سێشەممە 18-11-2025 وەزارەتی تەندروستیی لوبنان بڵاویکردەوە، لە هێرشێکی ئیسرائیلدا بۆ سەر کەمپی پەنابەرانی عەین حیلوە لە دەوروبەری شاری سەیدا، لانیکەم 11 کەس کوژران و 4 کەسی دیکەش بریندار بوون.
میدیای لوبنان بڵاویکردەوە، هێرشەکە ئۆتۆمبێلێکی لە نزیک مزگەوتی خالیدی کوڕی وەلید کردووەتە ئامانج و "دواتریش راگەیێندرا کە هێرشەکە مزگەوتەکە و ناوەندێکیشی بە هەمان ناوەوە کردووەتە ئامانج."
سوپای ئیسرائیل لەبارەی هێرشەکە رایگەیاند: "هێزەکانی بەرگریی ئیسرائیل هێرشیان کردە سەر چەند تیرۆریستێک کە لە بنکەیەکی راهێنانی حەماسدا لە ناوچەی عەین حیلوە لە باشووری لوبنان چالاکیان هەبوو."
راگەیێندراوەکەی سوپای ئیسرائیل هەروەها دەڵێ: "ئۆپەراسیۆنەکانیان دژی پێگەکانی حەماس لە لوبناندا بەردەوام دەبن."
