رووداو دیجیتاڵ
ئاگرە گەورەکەی نێو کۆمەڵگەیەکی نیشتەجێبوون لە هۆنگ کۆنگی چین کۆنترۆڵ کرا. لێکۆڵەران پێیانوایە هۆکارەکە گڕگرتنی ئەو ئەسکەلانە بووە کە بۆ کاری نۆژەنکردنەوە بەکارهاتوون.
رۆژی هەینی 28-11-2025 بەڕێوەبەرایەتیی ئاگرکوژێنەوەی هۆنگ کۆنگ رایگەیاند، دوای زیاتر لە 40 کاژێر، ئاگرەکە "کوژێندرایەوە" و لەو ماوەیەشدا کارمەندێکی ئاگرکوژێنەوە گیانی لەدەستداوە.
رۆژی چوارشەممە 26-11-2025 ئاگرێکی گەورە لە باڵەخانەکانی کۆمەڵگەی نیشتەجێبوونی (وانگ فوک کۆرت) لە ناوچەی تای پۆ لە هۆنگ کۆنگ کەوتەوە، کە کاری نۆژەنکردنەوەیان تێدا دەکرا. ئاگرەکە بە خێرایی بە حەوت تاوەری کۆمەڵگەکەدا بڵاوبووەوە کە هەر یەکەیان 31 نهۆمە و بە گشتی هەزار و 984 شوقەی تێدایە.
هۆنگ کۆنگ هەرێمێکی خۆبەڕێوەبەری چینە و دەکەوێتە باشووری رۆژهەڵاتی وڵاتەکە.
کریس تانگ، بەرپرسی ئاسایشی هۆنگ کۆنگ رایگەیاند، ژمارەی گیانلەدەستدان بۆ 128 کەس بەرزبووەتەوە و نزیکەی 200 کەسیش وەک بێسەروشوێن ناویان تۆمارکراوە. ئەمە بە کوشندەترین ئاگرکەوتنەوەی هۆنگ کۆنگ دادەنرێ لە ساڵی 1948ـەوە، کە لە رووداوی ئەو ساڵەدا 135 کەس گیانیان لەدەستدا.
گەڕان بەدوای رزگاربوواندا کۆتاییهاتووە و دەیان بریندار هێشتا لە نەخۆشخانەن کە 11 کەسیان باری تەندروستییان ناجێگیرە.
لێکۆڵینەوە لە پڕۆژەی نۆژەنکردنەوەکە و کۆمپانیای جێبەجێکار دەستی پێکردووە، تاوەکو ئێستا 11 کەس دەستگیرکراون.
کریس تانگ گوتی، پێدەچێت ئاگرەکە "لەو تۆڕانە دەستیپێکردبێت کە بۆ پاراستنی ئەسکەلەکان بەسترابوون. ئاگر لە پەنجەرەکان نزیکبووەتەوە، بەهۆی ئەوەی چوارچێوەی پەنجەرەکان لە فۆم و تەپەدۆر دروستکرابوو، ئاگر بەخێرایی بڵاوبووەتەوە."
لە گرتە ڤیدیۆییەکانی سۆشیاڵ میدیادا دەردەکەوێ کە ئاگرەکە لە چەند خولەکێکدا بە شێوەیەکی زۆر خێرا تەشەنە دەکات و بڵێسەی زۆر گەورەی لێدەردەچێت.
لەکارکەوتنی سیستمی ئاگادارکردنەوە
پشکنینە سەرەتاییەکان دەریانخستووە کە هەرچەندە تۆڕە پارێزەرەکان مەرجەکانی سەلامەتیی ئاگرکەوتنەوەیان تێدا بووە، "بەڵام ئەو تەختە فۆمانەی دەوری پەنجەرەکان زۆر بەخێرایی گڕیان گرتووە."
ئاندی یۆنگ، بەڕێوەبەری ئاگرکوژێنەوە رایگەیاند، لێکۆڵەران بۆیان دەرکەوتووە سیستمی ئاگادارکردنەوەی ئاگر لە هەشت باڵەخانەکەدا "لەکارکەوتبوون." دانیشتووانی کۆمەڵگەکە باسیان لەوە کردووە کە ناچار بوون لە دەرگای ماڵان بدەن بۆ ئەوەی دراوسێکانیان لە مەترسییەکە ئاگادار بکەنەوە.
کاردانەوەی حکومەت و لێکۆڵینەوەکان
حکومەتی هۆنگ کۆنگ بڕی 300 ملیۆن دۆلاری هۆنگ کۆنگی (38.5 ملیۆن دۆلاری ئەمریکی) وەک هاوکاری بۆ زیانلێکەوتووانی ئاگرەکە تەرخان کردووە و لانیکەم نۆ پەناگەی کردووەتەوە بۆ ئەو هەزاران دانیشتووەی ماڵەکانیان لەدەستداوە.
دەسەڵاتداران رایانگەیاندووە کە دوای ئەم کارەساتە، پشکنین بۆ هەموو ئەو کۆمەڵگە نیشتەجێیانە دەکەن کە کاری نۆژەنکردنەوەی گەورەیان تێدا دەکرێت.
هۆنگ کۆنگ یەکێکە لە قەرەباڵخترین ناوچەکانی جیهان، رووبەرەکەی دوو هەزار و 754 کیلۆمەتر چوارگۆشەیە و 7.5 ملیۆن کەسی تێدا دەژی، واتە حەوت هەزار و 100 کەس بۆ یەک کیلۆمەتر چوارگۆشە.
