رووداو دیجیتاڵ
پێش دەستپێکردنی دەنگدان لەسەر پڕۆژەیاسایەک کە پۆشینی پەچە لە شوێنە گشتییەکانی ئیسپانیا قەدەخە دەکات، پەرلەمانتارێکی هەرێمی مورسیا، بە پەچەوە دەچێتە نێو پەرلەمان و داوای قەدەخەکردنی دەکات.
ڤیرجینیا مارتینێز، کە پەرلەمانتاری پارتی ڤۆکسی راستڕەوی تووندڕەوە، بە پەچە و جلوبەرگێک کە تەواوی جەستەی داپۆشیبوو، چووە ناو هۆڵی پەرلەمانی هەرێمی مورسیا، ئەمەش بووە مایەی سەرسوڕمانێکی زۆری هاوکارە پەرلەمانتارەکانی کە بە جلوبەرگی فەرمییەوە دانیشتبوون و چاوەڕێی دەستپێکردنی دانیشتنەکە بوون.
نمایشی ئەو پەرلەمانتارە، هاوکات بوو لەگەڵ خستنەڕووی پێشنیازێکی پارتی ڤۆکس بۆ قەدەخەکردنی تەواوەتیی پەچە و عەبا لە سەرجەم شوێنە گشتییەکانی هەرێمی مورسیا، کە دەکەوێتە باشووری رۆژهەڵاتی ئیسپانیا و بە یەکێک لە ناوچە سەرەکییەکانی چالاکیی ئەو پارتە دادەنرێت.
ڤیرجینیا مارتینێز، پەرلەمانتاری هەرێمی مورسیای ئیسپانیا بە پەچەوە دەچێتە نێو پەرلەمان و داوای قەدەخەکردنی دەکات، دەڵێت: ئەمە زیندانی ژنانە pic.twitter.com/AXxmuO4Aav
— Rudaw (@Rudawkurdish) December 12, 2025
سەرەڕای ئەوەی میریام فوێرتێس، سەرۆکی پەرلەمانی مورسیا، رێگەی نەدا مارتینێز بەو جلوبەرگەوە گوتارەکەی پێشکێش بکات و پێشنیازی قەدەخەکردنەکەش لەلایەن زۆرینەی پارتەکانی دیکەی پەرلەمانەوە رەتکرایەوە، بەڵام ئەو سیاسەتڤانە توانی ئامانجە سەرەکییەکەی بپێکێت کە بریتی بوو لە وروژاندنی مشتومڕ و بوونە مانشێتی میدیاکانی ئیسپانیا و جیهان.
ئەو پەرلەمانتارە، گرتە ڤیدیۆی چوونەژوورەوەی بۆ ناو هۆڵی پەرلەمانی هەرێمی مورسیا و گفتوگۆکەی لەگەڵ سەرۆکی پەرلەمان، لە هەژمارە تایبەتەکانی خۆی لە تۆڕە کۆمەڵایەتییەکان بڵاوکردەوە بۆ ئەوەی پەیامەکەی بە فراوانی بگەیەنێت.
لە ڤیدیۆکەدا دەنگی سەرۆکی پەرلەمان دەبیسترێت کە پێی دەڵێت: "خاتوو مارتینێز، رێگەت پێنادەم بەو شێوەیە قسە بکەیت و تکایە داوات لێدەکەم جلەکانت بگۆڕیت."
دوای لابردنی پەچەکەی، گوتی: "ئێمە دڵخۆشین کە ئەم جلانە لێرە رێگەپێدراو نین، چونکە دوای 50 ساڵ لە دیموکراسی، دەبینین چۆن ژنان ناچار دەکرێن لەناو زیندانێکی قوماشدا بژین، شتێک کە ئازادی نییە بۆ هیچ ژنێک لە کۆمەڵگەی مۆدێرندا."
مارتینێز هەروەها گوتی: "ئێمە دڵخۆشین کە لەم پەرلەمانەدا رێگەپێدراو نین، بەڵام دەبێت دڵنیابینەوە لەوەی کە لە هیچ شوێنێکی گشتیی ئەم هەرێمەشدا رێگەپێدراو نەبێت."
لە مانگی ئابدا، ئەنجوومەنی شارەوانیی خومیا لە هەرێمی مورسیا، بڕیارێکی دەرکرد کە موسڵمانانی لە بەکارهێنانی دامەزراوە گشتییەکان بۆ ئاهەنگگێڕانی جەژنە ئایینییەکانیان قەدەخە دەکرد، بە بیانووی ئەوەی کە ئەو بۆنانە "نامۆن بە ناسنامەی ناوچەکە."
پێشنیازەکە لەلایەن پارتی ڤۆکسەوە خرابووەڕوو و بە پشتیوانیی پارتی گەلی راستڕۆ تێپەڕێندرا.
