رووداو دیجیتاڵ
دەستەی کارگێڕیی ناوەندی کێنەدی بڕیاریدا ناوی بەناوبانگترین ناوەندی هونەری و کولتووری لە واشنتن بگۆڕێت، کە ئێستا لەلایەن کەسانی نزیکی سەرۆکی ئەمریکاوە بەڕێوەدەبرێت، بۆ ئەوەی ببێتە ناوەندی (ترەمپ – کەنەدی).
کارۆلاین لێڤیت، گوتەبێژی کۆشکی سپی رۆژی پێنجشەممە لە پۆستێکی تۆڕی کۆمەڵایەتیی ئێکسدا رایگەیاند، بڕیارەکە "بە کۆی دەنگ" دراوە، ئەوەش وەک رێزلێنانێک بۆ "ئەو کارە سەرسوڕهێنەرەی سەرۆک (دۆناڵد) ترەمپ ئەم ساڵ بۆ رزگارکردنی تەلارەکە کردوویەتی، نەک تەنیا لەڕووی نۆژەنکردنەوەوە، بەڵکو لەڕووی دارایی و ناوبانگیشەوە."
ئەمە لەکاتێکدایە، بەگوێرەی بڕیارێکی وەزارەتی دەرەوەی ئەمریکا، ماوەیەکە ناوی ئەو سەرۆکە کۆمارییەی تەمەنی بووەتە 79 ساڵ، لەسەر "پەیمانگەی ئاشتی"ش لە واشنتن دانراوە.
ئەو گەورە بازرگانەی پێشووی بواری خانووبەرە، ناوی خۆی کردووەتە براندێک و بە رەنگی زێڕین لەسەر ئەو باڵەخانانە دەینووسێت کە خاوەندارێتییان دەکات.
ترەمپ پێشتر چەندین جار بە ئاشکرا و بە گاڵتەوە باسی دانانی ناوی خۆی لەسەر ئەو ناوەندە کولتووریە کردبوو لەپاڵ ناوی جۆن کێنەدی، سەرۆکی پێشووتری ئەمریکا کە لە ساڵی 1963 کوژرا.
ملیاردێرەکە دەستی بەسەر ئەو دامەزراوە کولتوورییەدا گرتووە کە تاوەکو ئێستا بێلایەن بوو، ئەوەش لەڕێگەی دامەزراندنی کەسانی نزیک لە خۆی لە پۆستە هەستیار و سەرەکییەکانی ناوەندەکەدا.
