رووداو دیجیتاڵ
رێکخراوی لێبووردنی نێودەوڵەتی رایدەگەیێنێت، هێزە ئەمنییەکانی ئێران بە بەکارهێنانی چەکی جەنگی، کۆمەڵکوژییەکی "بێ وێنە" دژی خۆپێشاندەران دەکەن و زۆربەیان لە سەربان و مزگەوتەکانەوە تەقە لە خەڵک دەکەن.
رۆژی چوارشەممە 14-01-2026، رێکخراوی لێبووردنی نێودەوڵەتی (Amnesty International) لە راپۆرتێکدا کە پشت بە بەڵگەی ڤیدیۆیی و گەواهیدانی شایەتحاڵەکان دەبەستێت، رایگەیاند: "دەسەڵاتدارانی ئێران لە هەڵمەتی سەرکوتکردنی خۆپێشاندەراندا، کۆمەڵکوژییەکی نایاسایییان بە قەبارەیەکی بێ وێنە کردووە."
رێکخراوەکە ئاشکرای کردووە، هێزە ئەمنییەکان لەسەر شەقام، سەربانی باڵەخانەکان، مزگەوتەکان و بنکەکانی پۆلیسەوە جێگیر کراون و بەردەوام تەقە لە خۆپێشاندەرانی بێچەک دەکەن. بەگوێرەی راپۆرتەکە، زۆربەی قوربانییەکان "سەر و سنگیان کراوەتە ئامانج."
لێبووردنی نێودەوڵەتی ئەو تووندوتیژییانەی وەک "پەرەسەندنێکی هاوئانگیکراوی سەرتاسەری" لە بەکارهێنانی هێزی کوشندە ناوبردووە، کە لە دوای 8ی کانوونی دووەمەوە و هاوکات لەگەڵ بڕینی هێڵەکانی ئینتەرنێت پەرەی سەندووە.
خۆپێشاندان و ناڕەزایەتی زۆربەی شارەکانی ئێرانی گرتووەتەوە. بەگوێرەی ئاماری رێکخراوەکانی مافی مرۆڤ، لەو ماوەیەدا نزیکەی 3400 کەس کوژراون.
لە 28ـی کانوونی یەکەمی 2025ـوە ناڕەزایی و خۆپێشاندان دژی گرانی و دابەزینی نرخی تمەن لەلایەن کاسبکارانی تارانەوە دەستیپێکرد و دواتر سەرجەم پارێزگاکانی ئێرانی گرتەوە و لە زۆربەی شارەکان گرژی تێکەوت.
بەگوێرەی ئامارەکانی ئاژانسی چالاکڤانانی مافی مرۆڤی ئێران (هرانا)، لە سەرەتای ناڕەزایەتییەکانەوە دوو هەزار و 403 کەس کوژراون، کە 147یان لە هێزە ئەمنییەکان و کەسانی سەر بە دەسەڵاتن، ئەوانی دیکە خەڵکی مەدەنین کە 12ـیان منداڵن.
بەپێی ئامارەکە، ژمارەیەکی بەرچاو لە خۆپێشاندەران بریندارن و برینی هەزار و 134ـیان سەختە. هەروەها تاوەکو ئێستا لە 18 هەزار و 434 دەستبەسەرکراو، دانپێدانانی زۆرەملێی 97ـیان لەلایەن حکومەتەوە بڵاوکراوەتەوە.
