رووداو دیجیتاڵ
سەرۆکی ئەمریکا ژمارەی پێوانەیی درێژترین گوتاری "ساڵانەی وڵات"ی لە مێژووی وڵاتەکەیدا شکاند و توانی پێش گوتارە بەنێوبانگەکەی ساڵی 2000ی بیڵ کلینتن بکەوێت.
رۆژی سێشەممە 24ی شوباتی 2026 (بەرەبەیانی ئەمڕۆ چوارشەممە 25ی شوبات بەکاتی هەولێر) دۆناڵد ترەمپ، سەرۆکی ئەمریکا درێژترین گوتاری فەرمیی ساڵانەی وڵاتی پێشکێش کرد. ترەمپ لەم گوتارە نوێیەیدا نەک هەر ریکۆردی کلینتنی شکاند، بەڵکو توانی ئەو ریکۆردەی خۆیشی تێپەڕێنێت کە لە مانگی ئاداری ساڵی 2025ـدا لەبەردەم کۆنگرێسدا تۆماری کردبوو.
ترەمپ بۆ ماوەی یەک کاژێر و 47 خولەک و 43 چرکە قسەی کرد، بەڵام چونکە ئەو گوتارەی ساڵی رابردوو لەڕووی تەکنیکییەوە وەک "ساڵانەی وڵات" پۆلێن نەکرابوو، ئەم گوتارەی ئێستای بە فەرمی وەکو درێژترین گوتار لە مێژووی ئەو بۆنە مێژووییەی ئەمریکا دا جێگیر کرا.
گوتاری "ساڵانەی وڵات" یەکێکە لە گرنگترین نەریتە سیاسییەکانی ئەمریکا، تێیدا سەرۆک لەبەردەم هەردوو ئەنجوومەنی پیران و نوێنەران پلانی ساڵی داهاتوو و دۆخی گشتیی وڵات دەخاتەڕوو.
ئەم نەریتە مێژووەکەی بۆ ساڵی 1790 دەگەڕێتەوە، کاتێک جۆرج واشنتن یەکەمین گوتاری لەو شێوەیەی پێشکێش کرد.
لەو کاتەوە تاوەکو ئێستا، شێواز و درێژیی گوتارەکان گۆڕانکاریی زۆریان بەسەردا هاتووە. لە کاتێکدا سەرۆکەکانی پێشوو گوتارەکانیان کورت و پوخت بوو، بەڵام لە چەند دەیەی رابردوودا و بەهۆی پەخشی راستەوخۆی تەلەڤیزیۆنییەوە، درێژبوونی گوتارەکان بووەتە ئاماژەیەک بۆ هەوڵی سەرۆکەکان تاوەکو زۆرترین پەیامی سیاسی و دەستکەوتەکانیان بۆ رای گشتی بخەنەڕوو.
ترەمپ بەم هەنگاوە نوێیەی، لاپەڕەیەکی دیکەی لە مێژووی سیاسیی واشنتن تۆمار کرد کە تێیدا جەخت لە مانەوەی درێژخایەنی خۆی لە ناوەندی بڕیاردا دەکاتەوە.
