ماهیر ئەمین چرای عیرفان لە خەرەندی رواندز هەڵدەکات

 

هونەرمەند ماهیر ئەمین، بە رووداوی راگەیاند، "چرای عیرفان" بەرهەمێکی عیرفانی و خوداناسییە. ئاماژەی بۆ ئەوەشکرد، بەرهەمەکە کاژێر 18:00 ئەمڕۆ شەممە 1ـی ئاداری 2025 لە کەناڵی تایبەتی خۆی لە یوتیوب بڵاودەکرێتەوە.

 

رەسوڵ رەش ئەحمەدی تێکستی بەرهەمەکەی نووسیوە و لە ئاواز و میوزیکی سەڕابە، هونەرمەند هێمن حوسێن بە سۆڵۆی نەی و تار تێیدا بەشدارە، کاری دەنگ، میکس و ماستەرینگی لەلایەن دیار دلاوەر کراوە.

 

بەرزۆ ئیبراهیم سەرپەرشتیاری بەرهەمەکەیە و لە دەرهێنانی سامی سادقە و بەشێکی زۆری دیمەنەکانی لە خەرەندی رواندز وێنەگیراوە.

 

ئەو هونەرمەندە جگە لە گۆرانی ئەوینداری، بەرهەمی نیشتمانی و عیرفانیشی هەیە، لەوانە "کاروانێ کوردا" کە بە زاراوەی کرمانجییە و لە 2016 بڵاوکرایەوە.

 

ماهیر ئەمین، لە رواندز لەدایکبووە، لە نەوەتەکانی سەدەی رابردوو دەستی بە کاری هونەری کردووە، چوار ئەلبووم و چەند گۆرانییەکی بە تاک بڵاوکردووەتەوە و بەشێکیان بەشێوەی ڤیدیۆکلیپ بەرهەمهاتوون.

 

یەکێک لەو بەرهەمانەی دەنگدانەوەی زۆری لە نێو خەڵکدا هەبوو، "سێوخان" بوو و 20 ساڵ بەر لە ئێستا بڵاوکرایەوە و ماهیر ئەمین، لە 2014 بە میوزیک و دابەشکردنێکی نوێ بەرهەمی هێناوەتەوە.