لە بەغدا بەربژێرێکی قۆزترین گەنجی عێراق کوژرا
رووداو- ئاژانسەکان
هێزە ئەمنییەکانی بەغدا تەرمی کەرار نووشی، بەربژێرێکی جوانترین گەنجی عێراق پاش ئەوەی دوو رۆژ بێسەروشوێن بوو بەکوژراوی لە شەقامی فەڵەستین دۆزییەوە.
ئێستا تەرمەکەی رەوانەی پزیشکی دادی رۆژهەڵاتی بەغدا کراوە و بە گوتەی چەند شایەدحاڵێک شوێنەواری چەقۆ و لێدان بە چەستەییەوە دیاربووە.
ماوەیەکی زۆرە وێنەی کەرار نووشی تۆڕە کۆمەڵایەتییەکانی تەنیوەو کەسانێکی زۆر بە جوانترین گەنجیان دەزانی و پاشان ناوبراو خۆی بۆ پێشبڕکێی جوانترین گەنجی عێراق بەربژێرکردبوو.
کەرار نووشی، خوێندکاری بەشی شانۆی کۆلیژی هونەرە جوانەکانی بەغدا بووە، بەهۆی ستایل و دیزانی جلوبەرگ و دەرکەوتنییەوە چەند جارێک هەڕەشەی کوشتنی لێکرابوو.