ئۆرکێسترای سیمفۆنیی چیك ئاوازێکی کوردی دەژەنێت و لە هەولێر پێشکێش دەکرێت

 

ئاوازەکە لە شێوەی میوزیکێکی ڤیدیۆیی 20 خولەکیدایە و لە سێ بەش پێکدێت: (میر بەدرخان)، (دەنگێک لە باکوور) و (جینۆساید)، تێیدا رووداوە مێژووییەکان و کەسایەتییە دیارەکانی کوردستان دەخاتەڕوو.

 

فەرهاد حەمەساڵح، هونەرمەند، لەبارەی کارەکەیەوە بە رووداوی گوت: بۆ مایسترۆکە باسی ئەو میوزیکە و روانین و گوزارشتی کردووە کە باس لە چی دەکات، ئەویش خۆی دوایی دەیگوت لە هەندێک شوێندا هەستی کردووە کارەساتێکی گەورە روویداوە، شتێکی ناخۆش روویداوە، کارەساتێک، کە ئەوەش دیارە لە بەشی جینۆسایدەکەدایە. 

 

گوتیشی: "ئێمە موزیکمان هەیە بە تێکست گوزارشت لە هەندێک بارودۆخ دەکات، لە جینۆساید و لە زۆر بابەتی دیکە، بەڵام وەک میوزیک زۆر نەمدیتەوە کە گوزارشت لە رووداوە مێژووییەکان بکات".

 

هونەرمەندان و ئامادەبووانی نمایشەکە، ئەم کارە بە هەنگاوێکی گرنگ بۆ ناساندنی مێژوو و هونەری کوردی بە جیهان دەزانن.

 

فەرهەنگ غەفوور، هونەرمەند و بەڕێوەبەری گشتی رۆشنبیری و هونەری هەولیر بە رووداوی گوت: "نموونەیەکە بۆ ئەوەی کە تۆ بە هەموو وڵاتانی دنیا بڵێی ئێمەش هونەرمەندی بەتوانامان هەیە، ئێمەش دەتوانین لە رێگەی میوزیکەوە مێژووی خۆمان بنووسینەوە".

 

ئەژین قادر، فەرمانبەر و یەکێک لە ئامادەبووانی چالاکییەکە بوو و باس لەوە دەکات: "بۆ ئەوەی بیرمان بهێنێتەوە کە ئێمە بە تەنیا مێژوویەکی ناخۆشمان تێنەپەڕاندووە، هەروەها ئێستا لە چ قۆناغێکی ژیانی خۆماندا دەژین و لە چ ئازادییەکدا دەژین، پێویستە ئێمە ئەم شتانەمان لەبیر بێت بۆ ئەوەی کوردایەتیی خۆمان لەبیر نەکەین".

 

ئاوازی (کوردستان) بۆ یەکەمجار لە 7ـی تشرینی یەکەمی 2023، لە شاری ستۆکهۆڵمی سوێد و لە یادی 100 ساڵەی رێککەوتننامەی لۆزان پێشکێشکرا.

 

رۆژی یەکشەممە 2ـی تشرینی دووەمی 2023، ئەم بەرهەمە میوزیکییە ڤیدیۆییە، لە بەڕێوەبەرایەتیی چالاکی قوتابخانەکانی هەولێر خرایەڕوو.