بە بەشداری 20 شێوەکاری کورد پێشانگەیەک لە پەرلەمانی وێڵز دەکرێتەوە

 

مەریوان جەلال، هونەرمەندی شێوەکار و رێکخەری پێشانگەکە، بە تۆڕی میدیایی رووداوی راگەیاند، پرۆژەی "دڵۆپە مروارییەکان" ئامانجی پێشکێشکردنی جوانناسییە لە میوزیک، شێوکاری و ڤیدیۆگرافیک، لە ئاستێکی بەرزدا بە ئەوروپییەکان، هەروەها بەشدارییەکی ئەرێنییە سەبارەت بە نمایشی هونەر و کولتووری کورد لەسەرانسەری ئەوروپادا.

 

گوتیشی، ئامانجی دیکەی پرۆژەی "دڵۆپە مروارییەکان"، دروستکردنی پردی کولتووری لە نێوان گەلانی ئەوروپا و کورد لە تاراوگە.

 

مەریوان جەلال، گوتیشی، هونەرمەندانی کورد لە باشووری کوردستان و هونەرمەندانی کورد لە تارواگە لە وڵاتانی ئەمریکا، کەنەدا، بەریتانیا، ئەڵمانیا، دانیمارک، نەرویج  و هۆڵەندا بەشدار دەبن.

 

ئەوەشی خستەڕوو، ئالان نەژاد، بەڕێوەبەری پرۆژەکەیە و دوو پەرلەمانتاری وێڵز سپۆنسەری پێشانگەکەن و گرووپی فاروق پشتیوانی دارایی دەکات و بە هاوکاری رێکخراوی کاوە سازدەکرێت.

 

پێشانگەکە رۆژی شەممە 6ـی نیسانی 2024 لە گەلەری ئایندەکان لە پێرهید، لە پەرلەمانی وێڵز لە شاری کاردف دەکرێتەوە و تاوکو 18ـی ئایار بەردەوام دەبێت.