لە سان دیێگۆ پێشانگەی شێوەکارانی کورد کرایەوە

 

پێشانگە هاوبەشی شێوەکارییەکە بۆ هونەرمەندان شەهریار جاف، سروە پاشایی، ئەمیر ئەلمالۆ و هیوا پاشایی بوو و چەند بەرهەمێکیان خستەڕوو. لە تابلۆکاندا ژنی کورد کارەکتەری سەرەکییە.

 

شەهریار جاف، شێوەکاری کورد، بە چەند تابلۆیەک لەبارەی ژنی کورد لە پێشانگەکەدا بەشداربوو و دەڵێت، ژنی کورد ئازا و ئازادە، ئەو لەچەکەی لەسەری داناوە بۆ جوانییە.

 

جگە لە رەوەندی کوردی لە ئەمریکا، خەڵکی بیانیش ئامادەی پێشانگەکە بوون. 

 

یەکێک لە ئامادەبووانی پێشانگەکە، سارا مەییە کە ژنێکی ئەمریکییە و هاوژینەکەی کوردە، لەگەڵ کچەکەی بە جلوبەرگی کوردییەوە سەردانی پێشانگەکەیان کردووە.

 

سارا مەی، دەڵێت: "ئەوە گرنگە بۆ من کولتووری کوردی پێشانی کچەکەم بدەم، لەبەر ئەوە هەرچەندە من ئەمریکییم، بەڵام ئەمڕۆ جلوبەرگی کوردیم پۆشیوە و جلی کوردیم لەبەر کچەکەشم کردووە. من دەمەوێت کچەکەم فێری کولتووری کوردی بێت، ئەوە تێبگات گرنگە زانیاری لەبارەی کۆمەڵگەی کوردی هەبێت". 

 

گوتیشی: "لێرە لە ساندیێگۆ ژمارەیەکی زۆر کوردی لێیە و ژمارەیەکی زۆریان ئەمڕۆ هاتوونەتە ئێرە بۆ ئەوەی ئەو هونەرە جوانە ببینن کە گوزارشت لە کولتووری کوردی دەکات."

 

ئامانجی دامەزراوەکە ناساندنی کولتووری کوردییە بە خەڵکی ئەمریکا و بۆ ئەم مەبەستە چالاکی کولتووری و هونەری لەو وڵاتە ئەنجام دەدات.

 

ساوندبایت

هیوا پاشایی، ئەندامی بۆردی ناوەندی کولتووری کوردی لە ئەمریکا، بە رووداوی راگەیاند، ناوەندی کولتووری کوردی ئامانجیەتی لە رێگەی سینەما، میوزیک، شانۆ و ئەدبەوە، کوردستان بە ئەمریکییەکان بناسێنێت.

 

ناوەندی کولتووری کوردی لە ئەمریکا لە 2023 لە کالیفۆرنیا دامەزراوە، لەلایەن بۆردێکەوە بەڕێوەدەبردرێت کە لە 11 ئەندام پێکهاتووە، ئەم پێشانگەیەش یەکەم چالاکییانە و بڕیارە بەم نزیکانە کۆنسێرتێک بۆ هونەرمەند دڵنیا رەزازی لە ئەمریکا سازبکەن.