رۆژ کەریم گۆرانی نیشتمانی بڵاوکردەوە
رووداو - ھەولێر
رەنج سەنگاوی شاعیر و پێشکەشکاری بەرنامەی لەگەڵ رەنج لە کەناڵی رووداو، تێکستێک لەبارەی کۆچەوە دەداتە ھونەرمەند رۆژ کەریم ئەویش دەیکاتە گۆرانی و بە شێوەی دەنگ بڵاویدەکاتەوە.
رۆژ کەریم بە (رووداو)ی راگەیاند "چەند رۆژێکە گۆرانی نیشتمانم کۆتاییھاتووە و تەنھا بە شێوەی دەنگ بڵاومکردەوە کە تێکستەکەی لەلایەن رەنج سەنگاوییەوە نووسراوە، خۆشم ئاوازم بۆ گۆرانییەکە داناوە".
رۆژ، ھۆکاری نەکردنە کلیپی ئەو گۆرانییەی ئاشکرادەکات و دەڵێت:" بە ھۆی نەبوونی کاتەوە نەمتوانیووە ئەم بەرھەمە بەشێوەی کلیپ بەرھەمبێنم و بڵاویبکەمەوە".
رۆژ گوتیشی: " ئەم بەرھەمە لەسەر کۆچ و کۆچبەرانە. بە داخەوە ئەوەی دەیبینیت ئەمڕۆ بیر لە جێھێشتنی کوردستان دەکاتەوە، ھیوادارم حکومەتی ھەرێمی کوردستان چاکسازی بکات بۆ ئەوەی کوردستان بە ئاوەدانی بمێنێتەوە".
رۆژ کەریم چەندین ساڵە لە تاراوگە دەژیێت و ھەروەھا بەشداری لە چەندین کۆنسێرتی خێرخوازی کردووە لە دەرەوەی کوردستان.