تارا مامەدۆڤا لە نوێترین بەرهەمیدا پەیامێک ئاڕاستەی پیاوان دەکات

 

ئەم بەرهەمە لە تێکست و ئاوازی تارا مامەدۆڤایە و کاری دابەشکردنی میوزیکی لەلایەن مەحەممەد دادا و کاری میکس لەلایەن تیموچین ئاکسور و کاری ماسترینگی لەلایەن جەم بۆیۆکوزون کراوە.

 

کاری دەرهێنانی ڤیدیۆکلیپەکە لەلایەن مەلۆدی تۆزوم کراوە و لە کەناڵی تایبەتی تارا مامەدۆڤا لە یوتیوب بڵاوکراوەتەوە.

 

تارا مامەدۆڤا، میوانی بووڵتەنی هونەری بوو کە بانوو دڵشاد پێشکێشی دەکات، لەبارەی ناوی ڤیدیۆکلیپەکەی گوتی: "سینۆ ئەو کارەکتەرەیە کە لە نێو ژیانی ئێمەدا هەیە و بە هەزاران ساڵە دەستی خستووەتە سەر ژیانمان، لە ماڵەوە، لە دەرەوە، لە کار، بەردەوام حاڵمان تێکدەدات و هێزمان لێدەستێنێت". 

 

ئاماژەی بۆ ئەوەشکرد: "ویستم ئەو دەردەی ئێمە بە زمانێکی شیرین و سادە باس بکەم". گوتیشی: "بۆ ماوەی یەک مانگ کاریان لەسەر ڤیدیۆکلیپەکە کردووە و خۆیان دیکۆڕی کلیپەکەیان دروستکردووە و لە ئیستەنبووڵ وێنەگیراوە".

 

تارا مامەدۆڤا، ئاشکرای کرد، ئێستا سەرقاڵی ڤیدیۆکلیپێکی نوێیە و بەناوی 'سپیندار'ـە و دیوی برینداری خۆی پێشاندەدات و چیرۆکێکی گەورەی لە پشتەوەیە. گوتیشی: "پلانی بۆ سازکردنی زنجیرە کۆنسێرتێک لە 2023 هەیە، یەکەم کۆنسێرتی لە کۆتایی شوباتی داهاتوو لە ئیستەنبووڵ دەبێت و لە مانگی ئایاری ئەمساڵیش لە باکووری کوردستان کۆنسێرت سازدەکات".

 

تارا مامەدۆڤا، لە 22ـی نیسانی 1983 لە ماڵباتێکی باکووری کوردستان لە کیرگستان لە دایکبووە و هەشت ساڵ لەو وڵاتە ژیاوە، دواتر رووی لە رووسیا کردووە و چوار ساڵ لەگەڵ ماڵباتەکەی لەوێ ماوەتەوە و لە فێرگەی دانس، شانۆ و میوزیک خوێندوویەتی. 

 

پاشان لەگەڵ ماڵباتەکەی روویان لە فەرەنسا کردووە و لە پاریس ماونەتەوە، ئێستا لە تورکیا ژیان بەسەر دەبات و خاوەنی دوو ئەلبوومی گۆرانییە بەناوەکانی 'ئاخ' و 'بەرهەڤکرن' جگە لە چەند گۆرانییەکی تاک و ڤیدیۆکلیپێک.