فیلمێکی بەریتانی دوو خەڵاتی بەدەستهێنا و ئەکتەرێکی کوردیش تێیدا بەشدارە

 

بەپێی راگەێندراوێکی بەشی راگەیاندنی فیلمەکە کە بۆ رووداو نێردراوە، فیلمەکە رۆژی یەکشەممە 16ـی تشرینی دووەمی 2025، لە فێستیڤاڵی نێودەوڵەتیی فیلمی فۆنیکس رایزینگ لە لەندەن، خەڵاتی باشترین دەستەی نواندن و باشترین کاریگەری پێبەخشرا.

 

چیرۆکی فیلمەکە لەبارەی کەسایەتییەک بەناوی حوسێن جلود، کە گوندنشینێکی عێراقییە و سکاڵای یاسایی دژی کۆمپانیای نەوتیی (بی پی - BP) تۆمارکردووە لەبارەی گیانلەدەستدانی کوڕەکەی، عەلی. رۆژنامەی (زە تایمز)ـی بەریتانی بڵاوی کردەوە، عەلی لە 2023 بە نەخۆشیی شێرپەنجەی خوێن (لۆکیمیا) کۆچی دوایی کردووە، باوکیشی دەڵێت، هۆکارەکەی سووتانی ئەو غازە بووە کە لە نزیک ماڵەکەیانەوە لە ناوچەی رومێلا کراوە.

 

سێر دەیڤید سوشێت، ئەکتەری بەریتانی رۆڵی سەرەکی لە فیلمەکەدا دەگێڕێت کە رۆڵی کارەکتەری خاوەن پشکێکی یەکێک لە کۆمپانیا نەوتییەکانە. هەر لە فیلمەکەدا ئاسۆ شێرەبەیانی، ئەکتەری کورد رۆڵی تێدا دەگێڕێت و تۆم چۆلمۆندلی، نووسەر و دەرهێنەریەتی.