داهاتی بەشی نوێی 'The Lion King' لە سینەماکاندا 591 ملیۆن دۆلارە
رووداو دیجیتاڵ
بەشی نوێی زنجیرە فیلمی "The Lion King" بەناوی "Mufasa" بەردەوامە لە بەدەستهێنانی داهات، کۆی داهاتی لە سینەماکانی جیهاندا 591 ملیۆن و 998 هەزار دۆلارە.
ئەم بەرهەمە لە 20ـی کانوونی یەکەمی 2024 بڵاوکرایەوە، لەو داهاتە 209 ملیۆن و 798 هەزار دۆلاری لە سینەماکانی ئەمریکای باکوور دا بەدەستهێناوە، لەم هەفتەیەدا لە ریزبەندی دووەمی لیستی فیلمە پڕداهاتەکانی ئەمریکای باکووردا هات. لە سینەماکانی جیهاندا 382 ملیۆن و 200 هەزار دۆلاری بەدەستهێناوە.
فیلمەکە بەرهەمی کۆمپانیای دیزنییە، ماوەکەی یەک کاژێر و 58 خولەکە، لە جۆری بەرهەمەکانی سەرکێشی ئاژەڵان، دراما، خێزانی، میوزیکئامێز و فانتاسییە.
"The Lion King" ئەمجارە باس لە چیرۆکی رەسەنی شا موفاسا دەکات و لە دەرهێنانی باری جێنکینز، دەرهێنەری ئەمریکییە.
فیلمەکە بە هەمان شێوەی دوایین بەشی زنجیرەکە بەرهەمهاتووە کە لە 2019 بەناوی " The Lion King" بڵاوکرایەوە و شێوازی ریالیتی وێنەیی تێیدا بەکارهاتووە.
بەرهەمهێنانی بەشی نوێی زنجیرەکە؛ بەهۆی سەرکەوتنی دوایین بەشی بوو کە لە 2019 بڵاوکرایەوە، داهاتی لە سینەماکانی جیهاندا یەک ملیار و 662 ملیۆن و 20 هەزار دۆلارە، لەو داهاتە 543 ملیۆن و 638 هەزار دۆلاری لە سینەماکانی ئەمریکای باکوور و یەک ملیار و 118 ملیۆن دۆلار و 382 هەزار دۆلاری لە سینەماکانی دیکەی جیهاندا بەدەستهێناوە. بودجەی بەرهەمهێنانی 260 ملیۆن دۆلار بووە.