"سێ رۆژ بوو تەرمی زاهید بریفکانی لە ماڵەکەیدا مابوویەوە"

رووداو – هەولێر

دوێنێ 22-ی ئەم مانگە، لە شاری دهۆک تەرمی هونەرمەند زاهید بریفکانی، لە ماڵەکەی خۆیدا دۆزرایەوە، کەسێک لە ماڵباتی ئەم هونەرمەندەش بە تۆڕی میدیایی رووداو-ی راگەیاند، کە ناوبراو بە چەقۆ کوژراوە.

هێمن ئەتروشی، بەرپرسی راگەیاندنی پۆلیسی دهۆک بە (تۆڕی میدیایی رووداو)ی راگەیاند، زاهید بریفکانی زیاتر لە رۆژێک بوو کوژرابوو کاتێک تەرمەکەی دۆزرایەوە، تا ئێستاش هیچ سەرە داوێک لە لێکۆڵینەوەکان لەسەر چۆنیەتی مردنی ئەم هونەرمەندە دیار نین.

گوتیشی، "لێکۆڵینەوەکان بەردەوامن و ئەوە دەرکەوتووە کە ئەم هونەرمەندە بە چەقۆ کوژراوە، بەڵام تا ئێستا دیار نییە کە لەسەرچی و بۆچی کوژراوە، یاخود کێ کوشتویەتی".

کەسێک لە ماڵباتی بریفکانی، دوێنی بە رووداو-ی گوت، "زاهید ماوەی ٣ رۆژ بوو لە ماڵەکەی خۆیدا کوژرابوو کاتێک تەرمەکەی دۆزرایەوە، چەند چەقۆیەک بە شوێنە جیاوازەکانی لەشی کەوتوون".