هەژار زەهاوی لە تاران وۆرکشۆپێکی لەسەر ئامێری دەف سازکرد
رووداو- هەولێر
هەژار زەهاوی، هونەرمەندی ناوداری کورد، بۆ یەکەمجار لە ئێران وۆرکشۆپێک لەسەر ئامێری دەف بۆ ماوەی دوو رۆژ سازکرد، کە 120 کەس بەشداریان تێیدا کردبوو.
هەژار زەهاوی، ژەنیاری ناوداری کورد لەبارەی ئەم وۆرکشۆپەوە بە رووداوی راگەیاند" رۆژانی 25 و 26 ی ئەم مانگە بۆ یەکەمجار لە تارانی پایتەختی ئێران، لەسەر داوای خانمی عەسەلی مەلکزادە، بەڕێوەبەری هونەری ئەم ۆورکشۆپەو بەسەرپەرشتی دەزگای فەرهەنگی و هونەری سورنا ئەم وۆرکشۆپەمان پێشكەشکرد".
هەژار زەهاوی، هەمیشە وەکو سێبەر دەفەکەی لەگەڵیدایەو، بەردەوامیش لە فێستیڤاڵە جیهانییەکاندا بەجل وبەرگی کوردییەوە بەشداری دەکات و میوزیک و هونەری کوردی لە رێگەی دەفەکەیەوە بەهەموو جیهان ناساندووە، هەژار زەهاوی ئێستا زیاتر وەکو هونەرمەندێکی جیهانی لە دنیادا دەناسرێت.