بۆ زنجیرەیەک گوندە کۆنەکانی ئینگلتەرا لە سڕبیا دروستکرانەوە

 

زنجیرەکە لە 10 ئەڵقە پێکدێت و باس لە ژیانی چەتە بەناوبانگەکەی ئینگلتەرا دەکات کە "لە دەوڵەمەندەکانی دەدزی و دەیدا بە هەژاران". 

 

زنجیرەکە لەلایەن کۆمپانیای (Lionsgate Television) بەرهەمهاتووە و بڕیارە لە 2ـی تشرینی دووەمی 2025 پەخش بکرێت.

 

بەرهەمەکە گێڕانەوەیەکی مۆدێرنە بۆ ئەفسانە ناسراوەکە و بە "سەرکێشییەکی رۆمانسیی فراوان" ناسێندراوە. 

 

هەروەها جەخت لەوە کراوەتەوە، تێڕوانینێکی مێژووییانە پێشکێش دەکات سەبارەت بەوەی؛ چۆن رۆبن هوود لەدوای داگیرکاریی نۆرمانەکان بۆ سەر ئینگلتەرا، گەورە بوو و بووە پاڵەوانێکی یاخیبوو.

 

جۆناسان ئینگلیش، دەرهێنەر و نووسەری زنجیرەکە، هاندەرێکی سەرەکیی پڕۆژەکە بووە، لە هەڤپەڤینێکدا رایگەیاند: "ئێمە سەرەتای رۆبن هوود نیشان دەدەین، چیرۆکەکە لە منداڵییەوە دەستپێدەکەین".

 

ئینگلیش کە خۆی بە "هەوادارێکی گەورەی هەموو شتێکی سەدەکانی ناوەڕاست" دەزانێت، سەرسامیی خۆی بە ناوبانگە جیهانییەکەی رۆبن هوود نیشاندا و گوتی: "دەتوانیت لە شەقامەکانی بێلگراد کەسێکی بەتەمەن رابگریت و دەزانێت رۆبن هوود کێیە، هەروەها دەتوانیت گەنجێک لە شەقامەکانی پەکین رابگریت و ئەویش دەزانێت رۆبن هوود کێیە".

 

لەبارەی گرنگی بەرهەمەکە بۆ ئەو سەردەمە، روونیکردەوە، رەنگە ئەمڕۆ زیاتر لە 50 ساڵ یان تەنانەت 100 ساڵ لەمەوبەر گرنگتر بێت.

 

گوتیشی: "ئەمە چیرۆکێکە لەبارەی چینایەتی و ستەمکاریی رەهای ئەو چینە، باس لەو کەسانە دەکات کە پێیانوایە دەتوانن هەموو شتێکیان هەبێت، هەموو شتێک کۆنترۆڵ بکەن و خاوەنی هەموو شتێک بن، لە کاتێکدا خەڵکی دیکە دەبێت پشتگوێ بخرێن".

 

چیرۆکی زنجیرەکە بە شێوەیەکی سەرەکی لەسەر پەیوەندییە خۆشەویستییەکەی نێوان رۆبن و ماریان چڕ دەبێتەوە. رۆبن کوڕی کەسێکی ساکسۆنییە و ماریان کچی لۆردێکی نۆرمانییە، بەڵام ئەوان بەسەر جیاوازییەکاندا زاڵ دەبن و پێکەوە بۆ ئازادی و دژی نادادپەروەری دەجەنگن.

 

جاک پاتن، ئەکتەری ئوسترالی، رۆڵی رۆبن دەگێڕێت و لۆرن مەککوین رۆڵی ماریان بەرجەستە دەکات. 

 

جۆن گلێن، شۆڕەنەر و نووسەری زنجیرەکە، رایگەیاند، بەرهەمەکە تەنانەت بە پێوەرەکانی هۆڵیوودیش "گەورەیە" و بە سەتان کارمەند و ستافەوە لە چەندین شوێنی جیاوازدا وێنەی گیراوە. 

 

زنجیرە نوێیەکەی بەوە ناساند کە "لە رووی شێواز و تۆنەوە زۆر زیاتر لە زنجیرەی (پیکی بڵایندەرز) دەچێت"، بە بەراورد بە بەرهەمەکانی پێشوو.