'The Count of Monte-Cristo' بەربژێری 14 خەڵاتی سیزەرە

 

ئەم بەرهەمە سینەماییە توانی رکابەری لەگەڵ فیلمی "L'Amour ouf" و "Emilia Pérez" بکات کە بەربژێری 13 خەڵات و 12 خەڵاتن.

 

لیستی بەربژێرکراوان بۆ 50یەمین رێوڕەسمی خەڵاتی سیزەر، رۆژی چوارشەممە 29ـی کانوونی دووەمی 2025 بڵاوکرایەوە، تێیدا لە چەند بوارێکی جیا جیادا؛ فیلم و فیلمسازان بەربژێری ئەو خەڵاتەی تایبەت بە سینەمای فەرەنسا کران. 

 

دیارترین ئەو خەڵاتانەی "The Count of Monte-Cristo" بۆی بەربژێرکراوە، خەڵاتی باشترین فیلم، باشترین دەرهێنەر و باشترین ئەکتەری سەرەکیی پیاوە.

 

چوار هەزار و 951 ئەندام لە ئەکادیمیای هونەر و تەکنیکی فەرەنسی، دەنگ لەبارەی براوەکان دەدەن و رێوڕەسمی دابەشکردنی خەڵاتەکانیش لە 28ـی شوباتی 2025 لە شانۆی ئۆلمپیادی پاریس بەڕێوەدەچێت.

 

کاترین دونۆڤ، ئەکتەری فەرەنسی، سەرۆکایەتی رێوڕەسمی بەخشینی خەڵاتەکە دەکات و خەڵاتی رێزلێنان دەبەخشرێتە کۆستا گاڤراس، دەرهێنەری فەرەنسی و جولیا رۆبێرتس، ئەکتەری ئەمریکی، وەک رێزێک لە تەواوی کار و بەرهەمە سینەماییەکانیان.

 

خەڵاتی سیزەر، خەڵاتێکی فەرەنسییە و 1976ـەوە لەلایەن ئەکادیمیای هونەر و تەکنیکی سینەما دەبەخشرێتە باشترین بەرهەمە سینەماییەکانی فەرەنسا. هاوشێوەی خەڵاتی ئۆسکارە بۆ فەرەنسا، ناوی خەڵاتەکە بۆ دیزاینەری پەیکەرەکە سیزەر بالداکینی، دیزاینەری ناسراوی فەرەنسی دەگەڕێتەوە.