هێڵی لەڤ بە ئینگلیزی و عەرەبی گۆرانی بۆ مۆندیال دەڵێت

 

هێڵی لەڤ، نوێترین بەرهەمی بەناوی 'Go Go Ale Ale' بۆ مۆندیالی 2022 لە قەتەر، بڵاوکردەوە کە ئاوازی خۆیەتی و لە تێکستی پرێنس سلومو و زیزۆیە.

 

ڤیدیۆکلیپی گۆرانییەکە لەلایەن محەممەد شێروانی کاری دەرهێنانی بۆ کراوە و دیمەنەکانی لەسەر قەڵای هەولێر وێنەگیراون و دیمەنی نێو کەمپی پەنابەر و ئاوارەکانی لەخۆدەگرێت، تێیدا چەند منداڵێک دەردەکەون کە تۆپیان بەدەستەوەیە.

 

هێڵی لەڤ، لە ڤیدیۆکلیپەکەدا درێسی هەڵبژاردەی ئەرجەنتن، بەڕازیل و پورتوگالی پۆشیوە و بە هەردوو زمانی ئینگلیزی و عەرەبی گۆرانی دەڵێت.

 

ڤیدیۆیەکی ڤیدیۆکلیپەکە بەر لە بڵاوبوونەوەی ئەم بەرهەمە، لە نێو تۆڕە کۆمەڵایەتییەکاندا دەنگدانەوەی زۆری بەدوای خۆیدا هێنا.

 

'کوردیش باربی' دوایین بەرهەمی راپی، هونەرمەند هێڵی  لەڤە و سێیەمی بەرهەمیەتی کە کۆمپانیای سۆنی بۆی بەرهەمدێنێت و بە زمانی ئینگلیزییە و لە 20ـی ئایاری 2022 بڵاوکرایەوە و زیاتر لە دوو ملیۆن و 400 هەزار بینەری لە یوتیوب هەیە.

 

هێڵی  لەڤ، پێشتر بە تۆڕی میدیایی رووداوی راگەیاند، 'کوردیش باربی' نوێترین بەرهەمیەتی و لە کوردستان و ئەڵمانیا وێنەگیراوە و بە ستایلی راپی ئەمریکی گوتراوە.

 

ئاماژەی بۆ ئەوەشکرد، ڤیدیۆکلیپەکە دەبێتە سێیەم کاری هاوبەشی لەگەڵ کۆمپانیای سۆنی و پێشتریش دوو بەرهەمی دیکەی بۆ بەرهەمهێناوە.

 

تێکست و ئاوازی راپەکە لەلایەن کۆمپانیای سۆنی دانراوە و هێڵی  لەڤ و لیڕۆی کاری دەرهێنانیان بۆ ڤیدیۆکلیپەکە کردووە.

 

هێڵی  لەڤ پێشتر بەرهەمێکی دیکەی دوێتی لەگەڵ ئاردیان بوجوپی، راپەری ئەلبانی – ئەڵمانی، بەناوی 'Guns & Roses' لە 18ـی کانوونی یەکەمی 2018 بڵاوکردەوە و زیاتر لە 23 ملیۆن بینەری لە یوتیوب هەیە.

 

ئەو هونەرمەندە یەکەم ڤیدیۆکلیپی بەناوی 'Risk It All' لە 2014 بڵاوکردەوە و دەنگدانەوەی زۆری لە کوردستان هەبوو، ساڵی دواتر ڤیدیۆکلیپێکی دیکەی بەناوی 'Revolution' بڵاوکردەوە و بە جلی سەربازی و چەک و فیشەکەوە لەم بەرهەمدا دەرکەوت.

 

بەرهەمەکانی ئەو گۆرانیبێژە کوردە دەنگدانەوەی جیهانییان هەبووە و سەرنجی میدیا جیهانییەکانی بەلای خۆیدا راکێشاوە و چەندین کەناڵی بەناوبانگی جیهانی هەڤپەیڤینیان لەگەڵدا ئەنجامداوە. 

 

هێڵی لەڤ ناوی تەواوی هێڵی ن عەبدوڵڵایە، گۆرانیبێژ، ئەکتەر، سەماکار و نمایشکاری جلوبەرگە، لە 16ـی تشرینی دووەمی 1988 لە ورمێی رۆژهەڵاتی کوردستان لە دایکبووە و خۆی خەڵکی دهۆکی باشووری کوردستانە، دواتر لەگەڵ ماڵباتەکەی روویان لە تورکیا کردووە، دواتریش لە فینلەند نیشتەجێبوونە، دەستپێکی کاری هونەریی کەڤەرکردنی گۆرانی بووە و لە مایسپەیس و یوتیوب بڵاویکردوونەتەوە.

 

ئەو هونەرمەندە لە 2014 رێکخراوی لەڤ هاوسی دامەزراند کە ئامانجی هاوکاریکردنی خەڵک و مافی ئاژەڵانە.