لەم بەرنامەیەی (رۆژی هیوا جەمال)دا کە رۆژی یەکشەممە ١٨-١-٢٠٢٦ لە تۆڕی میدیایی رووداو پەخش کرا، کۆمەڵێک دۆسیەی گرنگ خرانە روو. یەکێتی بۆ کابینەی دەیەم نەخشەیەکی نوێی داڕشتووە، لە عێراق کێبڕکێی سەرۆککۆمار و سەرۆکوەزیران گەرمە، لە سووریا شەڕی دەروونی و سەربازی لە دژی هەسەدە چڕ بووەتەوە و ئەمریکاش بنکەیەکی گرنگی لە عێراق چۆڵ کرد.
پاکێجێکی نوێی یەکێتی بۆ کابینەی دەیەم و سەرۆککۆمار
بەگوێرەی زانیارییەکان، یەکێتی داواکارییەکانی بۆ پێکهێنانی کابینەی دەیەم گۆڕیوە و پاکێجێکی نوێی ئامادە کردووە کە پۆستەکان دەکاتە دوو ستوونەوە و دەیخاتە بەردەم پارتی. ئەگەر رێککەوتن نەکرێت، یەکێتی و نەوەی نوێ داوای هەڵبژاردنی پێشوەختە دەکەن. لەبارەی سەرۆککۆماریشەوە، یەکێتی بە بەربژێری خۆی دەچێتە کێبڕکێ و هەر ئەندامێکیش پابەند نەبێت لە حیزب دەردەکرێت.
مشتومڕی بافڵ تاڵەبانی و شاخەوان عەبدوڵڵا
دوای لێدوانەکەی بافڵ تاڵەبانی لەسەر دوو بەربژێری بۆ سەرۆککۆمار، شاخەوان عەبدوڵڵا وەڵامی دایەوە و رایگەیاند بافڵ تاڵەبانی لە بەغدا "یاریپێکراوە نەک یاریکەر". شاخەوان عەبدوڵڵا ئاماژەی بەوە کرد کە پارتی توانیویەتی پۆستی جێگری سەرۆکی پەرلەمان وەربگرێتەوە و کشانەوەی ئەویش پیلانگێڕییەکانی لەگۆڕ ناوە.
مالیکی و چوارچێوەی هاوئاهەنگی
هێشتا چوارچێوەی هاوئاهەنگی لەسەر بەربژێری سەرۆکوەزیران یەکلایی نەبووەتەوە. دەوڵەتی یاسا و بەدر دەڵێن رێککەوتن لەسەر نووری مالیکی کراوە، بەڵام رەوتی حیلمە و حیکمە ئەو زانیارییانە رەتدەکەنەوە.
کشانەوەی تەواوەتیی ئەمریکا لە عەین ئەسەد
سوپای عێراق کۆنترۆڵکردنی تەواوەتیی بنکەی ئاسمانیی عەین ئەسەدی راگەیاند، دوای ئەوەی هێزەکانی ئەمریکا بە تەواوی کشاونەتەوە و تەنانەت کەلوپەلە سەربازییەکانیشیان بردووە.
قەیرانی ئاو لە پەرلەمانی عێراق
سبەی پەرلەمانی عێراق کۆبوونەوەیەکی تایبەت لەسەر قەیرانی ئاو ئەنجام دەدات، بە ئامادەبوونی وەزیرانی دەرەوە و سەرچاوە ئاوییەکان، بۆ تاوتوێکردنی مەترسییەکانی وشکەساڵی و کەمبوونەوەی ئاو لە دیجلە و فورات.
جەنگی دەروونی و سەربازی لە دژی هەسەدە
سوپای سووریا ژوورێکی ئۆپەراسیۆنی بۆ ترساندنی خەڵک لە تەبقە و رەققە دروست کردووە و دەیەوێت هەسەدە ناچار بە پاشەکشە بکات. ئەبوو عەلی بەرەد، جێگری مەزڵووم عەبدی رایگەیاند، دیمەشق رێککەوتنەکانی پێشێل کردووە و بە چەکی قورس هێرش دەکات. هاوکات چەکدارانی سەر بە حکومەت بە دروستکردنی ڤیدیۆی فەیک لە زیندانی تەبقە هەوڵی چەواشەکارییان داوە.
نێوەندگیریی عێراق و سەردانی فوئاد حوسێن بۆ تاران
فوئاد حوسێن گەیشتە تاران و زنجیرەیەک کۆبوونەوەی گرنگ ئەنجام دەدات بۆ نێوەندگیری و کەمکردنەوەی گرژییەکانی نێوان ئەمریکا و ئێران.
پلانی ١٢ خاڵی بۆ هەسەدە و هەڵگەڕانەوەی هۆزەکان
حکومەتی سووریا پلانێکی ١٢ خاڵی خستووەتە بەردەم هەسەدە کە تێیدا داوای تێکەڵکردنی تاکەکەسیی هێزەکانیان بە سوپا و رادەستکردنی کێڵگە نەوتییەکان دەکات. لەلایەکی دیکەوە، هۆزی بەککارە جیابوونەوەی خۆیان لە هەسەدە و چوونیان بۆ پاڵ حکومەتی سووریا راگەیاند.
ماکرۆن و نێچیرڤان بارزانی
ئیمانوێل ماکرۆن هۆشداری دایە دیمەشق و یەکپارچەیی سووریای بە تێکەڵکردنی هەسەدەوە گرێدا. هەروەها لە پەیوەندییەکی تەلەفۆنیدا لەگەڵ نێچیرڤان بارزانی، سەرۆکی هەرێمی کوردستان، تاوتوێی دۆخی سووریایان کرد. نێچیرڤان بارزانی لەگەڵ نێردەی ئەمریکا و فەرماندەی هەسەدەش کۆبووەوە و جەختی لە پاراستنی مافی کورد لە سووریا کردەوە.
رۆژی هیوا جەمال
شۆیەکی 50 خولەکییە هەموو بەیانییەک کاژێر 08:00 بەشێوەی زیندوو پێشکێش دەکرێت. تێیدا گفتوگۆی پڕ زانیاری لەگەڵ کەسانێک دەکرێ کە مەرج نییە لەنێو هەواڵەکاندا ناسراوبن، بەڵام مژارەکانیان زۆر گرنگن. هەوڵدەدرێ لە رێگەی چیرۆکە کەسییەکانەوە باشتر و ئاسانتر زانیاری بگەیێندرێتە خەڵک.
لە ماوەی بەرنامەکەدا هەوڵدەدرێ وەرگر بەشی تەواوی رۆژەکە بەرچاوڕوونیی هەبێ سەبارەت بەو شتانەی لە کوردستان و ناوچەکە و جیهانیش روودەدەن. هەموو بەیانییەکیش هیوا جەمال راستی و ناڕاستیی زانیارییەک ئاشکرا دەکات کە لەنێو خەڵک دا بڵاوبوونەتەوە.
دیوێکی جیاوازی دیکەی ئەم شۆیە، گەنگەشەی پێشکێشکارە لەنێو خەڵک و لەسەر شەقام لەسەر ئەو مژارانەی رای گشتییان بەخۆیەوە سەرقاڵ کردووە.
ئامانجی شۆیەکە ئەوەیە وەرگری کوردستانی لە هەواڵی ساختە (فەیک نیوز) دووربخاتەوە. وابکات هەمیشە بۆ زانینی ئەوەی بڕیار وایە بەدرێژایی رۆژ و رۆژانی دواتر رووبدات بگەڕێتەوە بۆ (رۆژی هیوا جەمال).
