توێژینەوەیەک پەیوەندیی نێوان گەدە و خەمۆکی دەخاتەڕوو

 

زانکۆی ئارهوس لە دانیمارک ئاماژە بەوەدەکات، خانە تایبەتەکانی نێو گەدە، سیگناڵ دەنێرن بۆ مێشک لە رێگەی "دەمارى ڤاگوس"ەوە (vagus nerve)، کە راستەوخۆ کاریگەری لەسەر باری دەروونی و هەستەکان هەیە.

 

زانکۆی ئارهوس لە دانیمارک جەخت دەکاتەوە بە بەکارهێنانی تەکنەلۆژیای پێشکەوتوو، توانیویانە ئەو خانانەی گەدە چالاک بکەن کە هەستی تێربوون و برسێتی کۆنترۆڵ دەکەن. لە ئەنجامدا بۆیان دەرکەوت کە هاندانی ئەم خانانە نەک تەنها کاریگەری لەسەر خواردن هەیە، بەڵکو دەبێتە هۆی کەمبوونەوەی رەفتارە پەیوەندیدارەکان بە دڵەڕاوکێ و خەمۆکییەوە لە مشکدا، بە تایبەتی، دەرکەوت کە هاندانی خانەکانی بەرهەمهێنی هۆرمۆنی "گرێلین" (ghrelin) کە بە "هۆرمۆنی برسێتی" ناسراوە، دەبێتە هۆی چالاکبوونی ئەو بەشانەی مێشک کە بەرپرسن لە پاداشت و ئاوەزی ئەرێنی.

 

زانکۆکە رایدەگەیێنێت لەوانەیە لە داهاتوودا بتوانرێت چارەسەری نوێ بۆ دڵەڕاوکێ و خەمۆکی پەرەی پێبدرێت لە جیاتی کارکردن لەسەر مێشک ، تەنیا کار لەسەر ئەو بازنە دەمارییەی نێوان گەدە و مێشک بکرێت.