چارەنووسی بڕیارەکەی وەزارەتی تەندروستی لەسەر تاقیگەکان چی لێهات؟

 

هەر یەکە لە بەڕێوەبەری گشتیی تەندروستیی دهۆک و هەڵەبجە لە بارەی رادەستکردنی تاقیگە حکومییەکان بە کۆمپانیای تایبەت رای پێچەوانەیان هەیە؛ د. ئافراسیاب موسا، بەڕێوەبەری گشتیی تەندروستیی دهۆک، بە رووداوی راگەیاند، ئەم پلانە لە قازانجی هاووڵاتییانە، بەڵام ئێستا راگیراوە و لیژنەیەک لە وەزارەتی تەندروستی تەرخانکراوە بۆ یەکلاییکردنەوەی ئەم بابەتە.

 

بەڕێوەبەری گشتیی تەندروستیی دهۆک پێیوایە، ئەگەر تاقیگە حکومییەکان بدرێنە ئەو کۆمپانیا تایبەتە، پشکنینە تاقیگەییەکان لە هەموو نەخۆشخانە حکومییەکان بەردەست دەبن و کۆمپانیاکە خۆی ئامێرەکان، کیتی پشکنینەکان و مادەکانیش دابیندەکات.

 

د. ئەفراسیاب گوتیشی، نرخەکانی هەمان نرخی پێشوو دەبێت کە لە نەخۆشخانە حکومییەکان هەیە.

 

لە بەرامبەردا د. ئازاد مستەفا، بەڕێوەبەری گشتیی تەندروستیی هەڵەبجە دەڵێت: ''پێدانی تاقیگەکان بە یەک کۆمپانیای تایبەت، زیانێکی گەورە لە داهاتی گشتی دەدات و ئێمە هیچ جۆرێک ناچینە ژێر ئەو بڕیارە و بزنسمانێک دەوڵەمەند ناکەین''.

 

بەڕێوەبەری گشتیی تەندروستیی هەڵەبجە ئاماژە بەوەش دەکات، ساڵی 2023، 123 ملیۆن دینار بۆ هەموو تاقیگەکانی هەڵەبجە خەرجکراوە، بەڵام بەگوێرەی ئەم گرێبەستە نوێیە دەبێت حکومەت 1 ملیار و 148 ملیۆن دینار خەرجبکات، بەواتای ئەوە دێت نزیکەی 10 ئەوەندەی ئەو داهاتەیە کە ئێستا خەرجدەکرێت.  

 

د. هێرش سەید سەلیم، جێگری بەڕێوەبەری گشتیی تەندروستیی سلێمانی دەڵێت: پێدانی تاقیگە حکومییەکان بە کۆمپانیای تایبەت، تائێستا هەر وەکو خۆی ماوەتەوە و وەزارەتی تەندروستی نەچۆتە ژێر باری رەتکردنەوەی گرێبەستەکە.