ئەنتیتۆباکۆ دەستپێدەکاتەوە؛ ئۆتۆمبێلێک بۆ ئەو کەسەی واز لە جگەرەکێشان دەهێنێت

 

د. ئاراس برادۆستی، بەڕێوەبەری دێسکی تەندروستی تۆڕی میدیایی رووداو دەڵێت لە ساڵی یەکەم و دووەمدا نزیکەی 12 هەزار و 500 کەس بەشدارییان لە پرۆژەکەدا کردووە و وازیان لە جگەرە و نێرگەلەکێشان هێناوە،  لە ساڵی سێیەمیشدا کەمپەینەکە دەستپێدەکاتەوە.

 

د. ئاراس برادۆستی دەشڵێت، بەمزوانە کلینیکی ئەنتیتۆباکۆ دەکرێتەوە.

 

بەڕێوەبەری دێسکی تەندروستی تۆڕی میدیایی رووداو روونیدەکاتەوە لە قۆناخی یەکەمی ناونووسیندا ئەمساڵ حەوت هەزار کەس ناویان تۆمارکردووە بۆ وازهێنان لە جگەرە و نێرگەلە، فۆڕمی خۆتۆمارکردن لە ئەمڕۆەوە دەکرێتەوە و هاونیشتمانییان دەتوانن ناویان تۆماربکەن. 

 

ئەنتیتۆباکۆ پرۆژەیەکی دێسکی تەندروستی تۆڕی میدیایی رووداوە بۆ وازهێنان لە جگەرە و نێرگەلەکێشان، ئەمساڵ بە سپۆنسەری سەرەکی کۆرەک تیلیکۆم بەڕێوەدەچێت. ئۆتۆمبیلێک دەبێتە خەڵاتی براوەی پرۆژەکە، جیاواز لە ساڵانی رابردوو، کڵینیکی ئەنتیتۆباکۆ دەکرێتەوە و چارەسەری پزیشکیی پێویست پیشکەشی ئەو کەسانە دەکەن کە بۆ وازهێنان لە جگەرە و نێرگەلە پێویستییان بە دەرمانە.