هۆشدارییەکی جیدی لەبارەی قەڵەوییەوە؛ بەردی گورچیلە دروستدەکات

 

توێژینەوەک لە زانکۆی ئالاباما لە ئەمریکا، کراوە و دەرکەوتووە، قەڵەوی دەبێتە هۆی تێکچوونی زیندەچالاکییەکانی جەستە، کە دواجار ژینگەیەکی نموونەیی بۆ کۆبوونەوە و دروستبوونی بەرد لە گورچیلەکاندا ساز دەکات.

 

بەپێی توێژینەوەکە، لە کەسانی قەڵەودا، رێژەی دەردانی ماددەی کالسیۆم و ئۆگزالەیت لە میزدا بەرز دەبێتەوە. 

 

کاتێک ئەم دوو مادەیە لە میزدا چڕدەبنەوە، پێکەوە یەکدەگرن و کریستاڵی بچووک دروست دەکەن، کە دواتر گەورە دەبن و دەگۆڕێن بۆ "بەردی کالسیۆم ئۆگزالەیت"، کە بە باوترین جۆری بەردی گورچیلە دادەنرێت.

 

دکتۆر کایل ود، پرۆفیسۆری یاریدەدەر لە بەشی میزەڕۆ لە زانکۆی ئالاباما، لەم بارەیەوە دەڵێت: "قەڵەوی کیمیای میزی مرۆڤ دەگۆڕێت. یەکێک لە گۆڕانکارییە سەرەکییەکان ئەوەیە کە میز ترشتر دەبێت (واتە pHی دادەبەزێت). ئەم ژینگە ترشە یارمەتیدەرە بۆ دروستبوونی بەردی جۆری یوریک ئەسید."