زانکۆی HSE لە رووسیا: لە رۆژهەڵاتی ناوەڕاست رێژەی منداڵبوون دابەزیوە
رووداو - تەندروستی
نەنکمان، پوورە گەورەکانمان، باو و باپیرانمان، هەمیشە وەچەی زۆریان دەخستەوە، بەڵام ئێستا رێژەی وەچەخستنەوە زۆر کەم بووەتەوە. ئەمەش بەگوێرەی توێژینەوەیەک لە رووسیا، لە رۆژهەڵاتی نێوەڕاست رێژەی منداڵبوونی خانمان لە حەوت منداڵەوە بووەتە نزیکەی سێ منداڵ.
توێژینەوەکە لە ساڵی 2016 لە زانکۆی HSE لە رووسیا کراوە و دەریخستووە، رۆژهەڵاتی نێوەڕاست "گەورەترین دابەزینی رێژەی منداڵبوونی لە 30 ساڵی رابردوودا لەسەر ئاستی جیهان هەبووە" بەتایبەت لە وڵاتانی ئوردن، عێراق و یەمەن و شارەزایان هۆشداری دەدەن کە هێشتا ئەمە بەردەوامە.
بەگوێرەی توێژینەوەیەکی دیکە، کە ماوەی 10 ساڵی خایاندووە لە 2001 تاکو 2021، دەرکەوتووە، وەچەخستنەوە لە رۆژهەڵاتی نێوەڕاست بە رێژەی 3.8٪ بۆ 24.3٪ کەمبووەتەوە، کە گەورەترین دابەزین لە ئوردن، عێراق و یەمەن بووە.
بەگوێرەی ئامارەکانی بانکی نێودەوڵەتی بۆ ساڵی 2023، پێنج وڵاتی ئەندامی کۆمکاری عەرەبی رێژەی منداڵبوونیان لە خوار 2.1 بووە، بۆ نموونە، ئیمارات رێژەکەی تەنیا 2.1 منداڵە کە تەنانەت لە ئەڵمانیاش 1.38ـە.
مارسیا ئینهۆرن، پڕۆفیسۆری مرۆڤناسی لە زانکۆی یەڵی ئەمریکی دەڵێت: شەڕ و نائارامیی سیاسی، قەیرانی ئابووری، هەڵاوسان و گرانبوونی تێچووی هاوسەرگیری و بەخێوکردنی منداڵ، لەگەڵ زیادبوونی نیگەرانییەکان دەربارەی گۆڕانی کەشوهەوا هۆکاری سەرەکین، هەروەها بەرزبوونەوەی ئاستی خوێندنی خانمان و چوونە ناو بازاڕی کار، بەردەستبوونی ئاسانکارییەکانی رێگریکردن لە دووگیانی هۆکاری دیکەن بۆ کەمی وەچەخستنەوە.
مارسیا دەڵێت؛ گەنجان توانای ئابووریی پێویستیان نییە بۆ دابینکردنی پێداویستییەکانی هاوسەرگیری بەتایبەت لە عێراق کە ئەرکی هاوسەرگیری و ماڵ و ئاڵتوون هەمووی لەسەر شانی گەنجانە، بۆیە گەنجان پییا باشترە چاوەڕێ بکەن. هەروەها دەشڵێت: خواست بۆ خێزانی گەورە کەمبووەتەوە. ئێستا بیرۆکەی پەروەردەکردنی خێزانێکی بچووکی کوالێتی بەرز زاڵە، لەبری خێزانێکی ژمارە زۆر.