هەموو زانیارییەک لەبارەی کڵینیکی ئەنتیتۆباکۆ بۆ وازهێنان لە جگەرە و نێرگەلەکێشان

 

 

کەسێك کە ناوی لە فۆڕمی ئەنتیتۆباکۆ تۆماردەکات، راستەوخۆ بەشێوەی لەدوای یەک لەلایەن ستافی کڵینیکەکەوە پەیوەندی پێوەدەکرێت و کاتی سەردانیکردنی بۆ دیاریدەکرێت، یاخود کەسەکە دەتوانێت راستەوخۆ سەردانی کڵینیک بکات لە کاژێر 10:00ی بەیانی بۆ 19:00ی ئێوارە.

 

 

کڵینیکی ئەنتیتۆباکۆ لە هەولێر- گوندی ئیتاڵی یەک لەسەر شەقامی 100 مەتری، ڤێللای ژمارە 239

 

 

07505014242

 

 

https://www.rudaw.net/sorani/forms/anti-tobacco

 

 

تیمێكی پزیشكی کە زیاتر لە 20 پزیشكی پسپۆڕی نەخۆشییەکانی هەناو و کۆئەندامی هەناسە، پزیشكانی دەروونی، پزیشكانی شارەزا و راهێندراو بۆ وازهێنان لە جگەرە و نێرگەلەکێشان لەخۆدەگرێت، سەرپەرشتی کڵینیکەکە دەکەن و چارەسەری پزیشكی و دەروونی بۆ بەشداربووان دەکەن. 

 

پزیشكان لە کڵینیکی ئەنتیتۆباکۆ، دوای هەڵسەنگاندن و پشکنینی بەشداربووان، ئەنجامدانی سەرجەم پشکنینە پێویستەکانی خوێن و پشکنینی نیشانە زیندەگییەکان، قسە لەگەڵ بەشداربووەکە دەکەن، راهێنانی دەروونی بۆ دەکەن و ئەو کەسانەی پێویستییان بە چارەسەرە، دەرمانە جیاوازەکانیان لەشێوەی بنێشت، حەب و لەزگە بۆ دەنووسرێت و شێوازی بەکارهێنانیان بۆ رووندەکرێتەوە، لە 5 سەردانیکردندا لەماوەی 12 هەفتە کەسەکە لە جگەرە و نێرگەلەکێشان دووردەکەوێتەوە و بەتەواوی وازدەهێنێت. 

 

 

ئەنتیتۆباکۆ کەمپەینێكی فراوانی تۆڕی میدیایی رووداوە بۆ وازهێنان لە جگەرە، نێرگەلە و جگەرەی ئەلیکترۆنی، ئامانجی کەمپەینەکە دروستکردنی کۆمەڵگەیەکی بێ دووکەڵە، کە هاونیشتمانییانی جگەرە و نێرگەلەنەکێشن، یان ئەوانەی جگەرە و نێرگەلەکێشن، لەڕێگەی کەمپەینەکەوە وازبهێنن. 

 

 

ئەنتیتۆباکۆ بۆ یەکەمجار لە 31-5ی 2017 کە دەکاتە رۆژی جیهانی بەرەنگاربوونەوەی جگەرەکێشان دەستیپێكرد، لە ساڵی یەکەمدا زیاتر لە 3500 کەس وازیان لە جگەرە و نێرگەلە هێنا، زیاتر لە 100 کەس خەڵاتی جیاوازیان بەسەردا دابەشکرا، ئەمە جگە لەوەی هەموو بەشداربووان براوەی تەندروستیی و سەلامەتی خۆیان بوون. 

 

 

کەمپەینی ئەنتیتۆباکۆ لە ساڵی دووەمیدا بەشێوەیەکی فراوانتر دەستیپێكردەوە، زیاتر لە 9000 کەس ناویان تۆمارکرد، بەشداربوون و وازیان لە جگەرەکێشان هێنا، چەندین قۆناخی ناوتۆمارکردن، هەڵسەنگاندن، پشكنین و خەڵاتکردنی بەشداربووان کۆتایی هات، لەکۆتایی پرۆژەکە براوەی یەکەم بە تیروپشک ئۆتۆمبێلێكی گرانبەهای کیلۆمەتر سفری بردەوە. 

 

 

ئەمساڵ کەمپەینی ئەنتیتۆباکۆ لە ساڵی سێیەمیدا تەواو جیاوازە، جگە لەوەی کەمپەینێكی فراوان دەستیپێكردووە و تەنیا لە چەند مانگی سەرەتای کەمپەینەکە زیاتر لە 15 هەزار کەس بەشدارییان کردووە و ناویان بۆ وازهێنان لە جگەرە، نێرگەلە و جگەرەی ئەلیکترۆنی تۆمارکردووە، جیاوازی کەمپەینی ئەمساڵ لەوەیە کە کڵینیکێكی تایبەت بە وازهێنان لە جگەرە و نێرگەلەکێشان کراوەتەوە و لەڕووی پزیشكی و دەروونییەوە چارەسەری بەشداربووان لەلایەن تیمێكی پزیشكییەوە دەکات. 

 

 

خەڵاتی ئەمساڵی پرۆژەی ئەنتیتۆباکۆ ئۆتۆمبێلێكی مۆدێڵ بەرزی گرانبەهایە، لەلایەن کۆمپانیای کۆڕەک تیلیکۆم کە سپۆنسەری سەرەکی کەمپەینی ئەنتیتۆباکۆیە دابینکراوە.