دوو ئامێر لە فڕۆکەخانەی هەولێر بۆ ناسینەوەی هەڵگرانی ڤایرۆسی کۆرۆنا دانراون

 

ئامێرەکان دەتوانن پلەی گەرمیی بەرزی جەستە دەستنیشانبکەن، بەمەش ناهێڵێت حاڵەتە گومانلێکراوەکان دەربازبن و پشکنینی گشتییان بۆ دەکرێت، ئەگەر دەرکەوت تووشبووی کۆرۆنان دیپۆرتی وڵاتەکانی خۆیان دەکرێنەوە.

 

 

کۆرۆنا جۆرێکی ڤایرۆسە کە تووشی شیردەرەکان و باڵندەکان دەبێت، لە 31 کانوونی یەکەمی 2019 لەلایەن چینەوە هۆشداری درایە رێکخراوی تەندروستیی جیهانی لە بوونی چەند حاڵەتێکی تووشبوو بە نەخۆشییەکە.

 

ڤایرۆسەکە کاردەکاتە سەر کۆئەندامی هەناسە و دەبێتە هۆی کۆکەی قورس و هەناسە تووندی. تاوەکو ئێستا هیچ جۆرە پێکوتە و دژەڤایرۆسێک نەدۆزراوەتەوە کە بتوانێت بەتەواوی لەنێوی ببات، چونکە ریزبەندی بۆماوەیی بەخێرایی دەگۆڕێت.

 

تاوەکو ئێستاش تەنیا لە چین لانیکەم 41 کەس بەهۆی تووشبوون بەم ڤایرۆسە گیانیان لەدەستداوە.