سەرۆکی سەندیکای دەرمانسازان: ناڕازین لە کردنەوەی ئەو هەموو کۆلێژە تایبەتییەی دەرمانسازی

 

ئەمڕۆ چوارشەممە 25-9-2025 د. باریف زاهیر، سەرۆکی سەندیکای دەرمانسازانی کوردستان لە بووڵتەنی تەندروستی رایگەیاند، "ژمارەی خوێندکارانی دەرمانسازی لە کۆلێژە تایبەت و حکومییەکان زیادی کردووە، بەڵام هێشتاش کۆلێژی تایبەت دەکرێتەوە." گوتیشی، "ئێمە ناڕازین لەبەرامبەر کردنەوەی ئەو هەموو کۆلێژە تایبەتیانە و وەرگرتنی ئەو هەموو خوێندکارە."

 

سەبارەت بە مووچەی دەرمانسازان، د. باریف زاهیر ئاماژەی بەوە کرد، "کەسێک 5 ساڵ کۆلێژی دەرمانسازی خوێندبێت، ناکرێت بە مووچەیەکی کەم کار بکات، بۆیە سیستمێکی تایبەتمان بۆ مووچەی دەرمانسازان داناوە و نابێت مووچەیان کەم بێت."

 

سەرۆکی سەندیکای دەرمانسازان جەختی لەوەش کردەوە، "زۆربەی دەرمانخانەکان دەرمانسازیان هەیە و ئەو شوێنانەی دەرمانسازی تێدا نییە، بەپێی یاسا بە دەرمانخانە هەژمار ناکرێن." ئاشکراشی کرد، "کۆمەڵێک دەرمانخانە بەهۆی نەبوونی دەرمانسازەوە سزادراون."

 

د. باریف زاهیر، داوای لە وەزارەتی تەندروستی کرد بڕیارێک دەربکات کە تەنیا دەرمانسازان وەک نوێنەری زانستیی کۆمپانیاکانی دەرمان کار بکەن، گوتی " وەزارەتی تەندروستی کرد دەتوانێت بەیەک کاژێر ئەو بڕیارە دەربکات و چالاکی بکات.

 

لەبارەی دامەزراندنەوە، گوتی، "دانەمەزراندن برینێکە لە دڵی هەموو دەرمانسازان و پێویستە وەزارەتی تەندروستی هەموو دەرمانسازان دابمەزرێنێت."