لە ئیدارەی سەربەخۆی سۆران کردنەوەی نۆرینگە و سەنتەری پزیشکی سنوردار دەکرێن
رووداو - تەندروستی
بەڕێوەبەرایەتی گشتیی تەندروستیی سۆران رایدەگەیێنیت، كردنەوەی دەرمانخانە ،نۆرینگە و سەنتەری پزیشکی لە ئیدارەی سەربەخۆی سۆران سنوردار دەکرێن.
بەڕێوەبەرایەتی گشتیی تەندروستیی سۆران ئاماژە بەوەدەکات، بۆ کردنەوەی دەرمانخانە، تاقیگەی پزیشکی، نۆرینگەی یاریدەدەری پزیشکی و سەنتەری پزیشکی دەبێت لە لایەن لیژنەی تەندروستیی بەرێوەبەرایەتیی گشتیی تەندروستیی سۆران هەلسەنگاندنیان بۆ بکرێت.
تەندروستیی سۆران دەشڵێت، دەبێت مەرجەکانی تەندروستی، شوێنی جوگرافی و شوێنی کارکردن هەڵبسەنگێندرێن، دواتر لارینەبوون بدرێت و لەلایەن سەندیکا پەیوەندیدارەکان مۆلەتی کارکردن بدرێت.
بەگوێرەی تەندروستیی سۆران، دەرکردنی ئەم بڕیارە لە پێناو کۆنتڕۆڵکردنی کوالێتی و جێبەجێکردنی رێنەماییەکانی تەندروستییە لە سنوری ئیدارەی سەربەخۆی سۆران.