مایۆکلینیک: لەمەودوا لەڕێگەی تارماییەوە ئەندامەکانی جەستە دەچێنین

 

سەنتەرەکە ئاماژە بەوەدەکات، هەزاران کەس لە جیهاندا چاوەڕێی وەرگرتنی ئەندامێکی نوێن، وەک دڵ، جگەر یان گورچیلە و زۆربەیان بەهۆی نەبوونی ئەندامی بەخشراوەوە گیان لەدەستدەدەن. بەڵام ئێستا، لەڕێگەی تەکنەلۆژیایەکەوە  بە ناوی "ئەندامی تارمایی" (Ghost Organ) ییەوە،  ئەم کێشەیە بۆ هەمیشە چارەسەر دەکرێت.

 

 

لە قۆناخی یەکەمدا ئەندامێک دەهێنن، ئەندامێک لە ئاژەڵێکەوە وەردەگرن، زۆربەی کات لە بەراز، چونکە ئەندامەکانیان لە رووی قەبارە و شێوەوە زۆر لە هی مرۆڤ دەچێت.

 

لە قۆناخی دووەمدا دەست بە پڕۆسەی پاککردنەوەی ئەندامەکە دەکەن پاشان، بە بەکارهێنانی مادەی کیمیایی تایبەت، وەک سابوونێکی زۆر بەهێز، هەموو خانەکانی بەرازەکە لەناو ئەندامەکە لادەبەن. هەموو شتێک کە پەیوەندیی بە بەرازەکەوە هەیە نامێنێت.

 

دوای ئەم پاککردنەوەیە، ئەوەی دەمێنێتەوە تەنیا پەیکەرێکی سپی و نیمچە روونە کە لە پڕۆتین دروستکراوە. وەک "قاڵب" یان "چوارچێوە"ی ئەندامەکە وایە. هەر بۆیەش پێی دەگوترێت "ئەندامی تارمایی"، چونکە تەنیا شێوەکەی دەمێنێتەوە.

 

زیندووکردنەوە: لە کۆتاییدا، ئەم قاڵبە بە خانەی بنەڕەتیی خودی نەخۆشەکە (خانەیەک کە دەتوانێت ببێت بە هەر جۆرە خانەیەک) دادەپۆشرێتەوە. خانەکان دەستدەکەن بە گەشەکردن و جێگیربوون لەسەر پەیکەرەکە، تاوەکو وردە وردە ئەندامێکی نوێ دروست دەکەن کە لە خانەی خودی نەخۆشەکە پێکهاتووە.

 

 

ئەم تەکنەلۆژیایە دوو کێشەی زۆر گەورە چارەسەر دەکات؛ کەمیی ئەندام: چیدیکە پێویست ناکات چاوەڕێی کەسێک بکەیت ئەندامێک ببەخشێت، چونکە دەتوانرێت ئەندامی ئاژەڵ بەکاربهێنرێت. رەتکردنەوەی ئەندام: گرنگترین سوودی ئەوەیە کە جەستەی نەخۆشەکە ئەندامە نوێیەکە رەتناکاتەوە. چونکە لە خانەی خۆی دروستکراوە، سیستمی بەرگریی جەستەی وەک شتێکی نامۆ سەیری ناکات و هێرشی ناکاتە سەر، ئەمەش واتە نەخۆش پێویستی بە خواردنی دەرمانی دژە-رەتکردنەوە بۆ هەتاهەتایە نابێت.