کچە 13 ساڵانەکەی هەولێر دۆزرایەوە
رووداو دیجیتاڵ
ئەو کچە تەمەن 13 ساڵانەی کە لە هەولێر ونببوو، لە سنووری پارێزگای نەینەوا دۆزرایەوە و خوشکێکی دەڵێت "لای هێزێکی کوردییە و سەلامەتە".
ئەمڕۆ چوارشەممە، 01-02-2023، رەندە حوسێن، خوشکی کچە ونبووەکەی هەولێر بە رووداوی گوت، "هێشتا نازانین چی روویداوە، بەڵام خوشکەکەم لە سنووری نەینەوا دۆزراوەتەوە و بە دەنگ و رەنگ قسەم لەگەڵ کردووە و دڵنیام کە سەلامەتە".
رەندە حوسێن گوتی، "خوشکەکەم لای هێزێکی کوردییە و ئەوان ئاگاداری دەبن و دەیگەڕێننەوە بۆ هەولێر".
بەسمە حوسێن، لە 29-01-2023 لە ماڵ چووبووە دەرەوە و نەگەڕابووەوە. بەسمە پەرکەمی هەبووە. هەمان رۆژ باوکی پۆلیسی ئاگادارکردووەتەوە.
ماڵباتی بەسمە حوسێن، خەڵکی شنگالن و لە ساڵی 2014ـەوە لە هەولێر نیشتەجێبوون.