حەوتەم خولی راهێنانی رووداو و نەتەوە یەکگرتووەکان بۆ ژنانی پارێزگای دهۆک دەبێت

لە ماوەی 12 مانگدا تۆڕی میدیایی رووداو بە هاوبەشی لەگەڵ سندووقی نەتەوە یەکگرتووەکان بۆ دانیشتووان (UNFPA)، راهێنان بە زیاتر لە 300 ژن لە سەرانسەری عێراق دەکات.

 

مانگی یەکەم راهێنانەکە تایبەت بوو بە پارێزگای هەولێر و پاشان دانیشتووانی پارێزگای بەغدا، سێیەم راهێنانیشی تایبەت بوو بە کچان و ژنان لە پارێزگای نەینەوا، چوارەم راهێنانیش تایبەت بوو بە دانیشتووانی پارێزگای سلێمانی و پێنجەم بە پارێزگای کەرکووک. دوایین راهێنانیش تایبەت بوو بە دانیشتووانی ئەنبار و سەلاحەدین. راهێنانی ئەمجارە تایبەت دەبێت بە پارێزگای دهۆک. 

 

ئامانجی راهێنانەکە درێژەدانە بە هەوڵەکانی تۆڕی میدیایی رووداو بۆ پاڵپشتیکردن و جێبەجێکردنی ئامانجەکانی گەشەپێدانی بەردەوام، کە لە ساڵی 2015ـەوە بووەتە پلان و ئامانجێکی سەرەکیی نەتەوە یەکگرتووەکان.

 

کۆمپانیای گووگڵ، ئینتەرنیوز و رێکخراوی سید بەشداری لە راهێنانەکە دەکەن و وانەی تایبەت بە خۆیان دەبێت. هەروەها پاش تەواوبوونی راهێنانەکە، بەشداربووان بڕوانامەی بەشداریکردنیان پێدەبەخشرێت.

 

لە رۆژی 04-06-2024ـەوە تاوەکو 14-06-2024، ناو تۆمارکردن دەکرێتەوە بۆ راهێنانێکی بەهێز بۆ ئافرەتان. ئەو کەسانەی خواستی بەشداریکردنیان هەیە و مەرجەکانی خوارەوە دەیانگرێتەوە، دەتوانن سیڤییەکانیان بۆ ئەم ئیمێڵە (training@rudaw.net) بنێرن.

 

ئەو کەسانەی هەڵدەبژێردرێن، هاتووچۆ، خواردن و شوێنی مانەوەیان بۆ دابین دەکرێت.

 

 

- خوێندکاری قۆناخی کۆتایی یان دەرچووی تازەی زانکۆ بێت

- شارەزایی کوردی و زمانێکی دیکەی هەبێت

- خواستی راستەقینەی بۆ رۆژنامەگەری هەبێت

- توانای پەیوەندیکردن و نووسینی هەبێت

- زیادکردنی بەشداری و کاریگەربوونی ژنان لە بواری رۆژنامەگەری دا خواستێکی سەرەکی بێت