لە سەرێکانی ژمارەیەک چەکدار لەسەر ئایسکریم منداڵێک بریندار دەکەن
رووداو دیجیتاڵ
لە شارۆچکەی سەرێکانی ـی رۆژئاوای کوردستان، چەکدارانی بزووتنەوەی ئەلسائیروون کە سەر بە تورکیان، تەقەیان لە منداڵێکی ئایسکریم فرۆش کرد و برینداریان کرد.
بەپێی زانیارییەکانی رووداو، ئەو منداڵە ناوی حەمید خەڵەفە و تەمەنی 12 ساڵانە، چەکدارەکان ویستوویانە بێبەرامبەر دۆندرمەکەی ببەن، ئەویش رێگەی پێنەداون، چەکدارەکانیش تەقەیان لە قاچەکانی کردووە و بە گولـلە برینداریان کردووە.
دوای رووداوەکە کە رۆژی یەکشەممە 3.7.2022 روویداوە، منداڵەکە گەیێندراوەتە نەخۆشخانەی سەرێکانی و لەوێ چارەسەر وەردەگرێت.
لەلایەکی دیکەوە، ئەمڕۆ دووشەممە 4.7.2022 روانگەی عەرەبی لە گرێسپی رایگەیاند لەسەر ئەو دۆسیەیە سێ چەکداری گرووپی بزووتنەوەی سائیروون دەستگیرکراون و رەوانەی دادگە کراون.