بەرپرسێکی ئەنجوومەنی باڵای دادوەریی عێراق: زۆربەی چەکدارە بیانییە دەستگیرکراوەکانی کەمپی هۆڵ تۆمەتبارن

 

 

 

دادوەر عەلی زیا رایگەیاند: "بەهۆی رەتکردنەوەی رادەستکردنی هەندێک لەو تۆمەتبارانەی کە هەڵاتوون بۆ وڵاتان و لە عێراق داواکراون، پەنایان بردووەتە بەر دادگەییکردنی ئەو تۆمەتبارانە لەو وڵاتانە، بەڵام لەسەر بنەمای ئەو بەڵگەنامانەی کە دادگەکانی عێراق پێشکێشی دەکەن."

 

ئەو دادوەرە بە میدیای فەرمیی عێراقی راگەیاندووە کە بەڵگەنامەکانیان دەیسەلمێنێت ئەو داواکراوانەی عێراقیان بەجێهێشتووە لە تاوانی کۆمەڵکوژی و دژ بە مرۆڤایەتییەوە گلاون.

 

زۆرینەی ئەو تۆمەتبارانەی کە لە ماوەی رابردوودا عێراق لە رێگەی پۆلیسی نێودەوڵەتی (ئینتەرپوڵ) وەریگرتوونەتەوە، ئەوانەن کە تۆمەتبار بوون بە گەندەڵیی دارایی و کارگێڕی.

 

 بەرپرسی هاریکاریی دادوەریی نێودەوڵەتی رایگەیاند: "ژمارەی چەکدارە بیانییەکان لە کەمپی هۆل زیاتر لە چوار هەزار کەسە، زۆرینەیان تاوانبارن و تاوانەکانیان کۆمەڵکوژی و دژ بە مرۆڤایەتین. لەسەر ئەو بنەمایەی ئەو کاتەی داعش خەلافەتی راگەیاندووە، چووەتە ناوچەکانیان و ئەوەش بەڵگەی ئەوەیە کە پێشوەخت زانیارییان لەسەر هەڵسوکەوتە تاوانکارییەکانیان هەبووە."

 

بەگوێرەی ئامارە فەرمییەکانی کەمپی هۆڵ، نزیکەیى 27 هەزار کەس لە کەمپەکەن  15 هەزاریان سووریایین و پێنج هەزاریان عێراقین، ئەوانی دیکە هاووڵاتی 42 وڵاتی دیکەن.