وەزیری دەرەوەی فەرەنسا لە هەولێرە و لەگەڵ سەرۆکی هەرێمی کوردستان کۆدەبێتەوە

 

 

بڕیارە وەزیری دەروەی فەرەنسا ئەمشەوی پێنجشەممە لە هەولێر بمێنێتەوە و تاوەکو سبەی لەگەڵ هەریەکە لە سەرۆک بارزانی، نێچیرڤان بارزانی و مەزڵووم عەبدی کۆببێتەوە.

 

کەمێک لەمەوبەر، وەزیری دەرەوەی فەرەنسا گەیشتە سەرۆکایەتیی هەرێمی کوردستان و بڕیارە پاش کۆبوونەوەی لەگەڵ نێچیرڤان بارزانی، سەرۆکی هەرێمی کوردستان، پێکەوە کۆنفرانسێکی رۆژنامەڤانییان هەبێت.

 

هەر ئەمڕۆ 5-2-2026، وەزیری دەرەوەی فەرەنسا لە بەغداوە رایگەیاند، "بۆ کارێکی گرنگ هاتوومەتە بەغدا، پێکەوەبوون دژی داعش گرنگە و فەرەنسا بەردەوام دەبێت لە شەڕی دژ بە تیرۆر".

 

ژان نوێل بارۆ، وەزیری دەرەوەی فەرەنسا و فواد حوسێن، وەزیری دەرەوەی عێراق لە پاش کۆبوونەوەیان لە بەغدا، کۆنفرانسێکی رۆژنامەڤانییان کرد.

 

ژان نوێل بارۆ باسی دۆخی ناوچەکەی بە گشتی کرد، گوتی دەبێ هەموولایەک پابەندی ئاشتی بن و لە شەڕی دژ بە تیرۆر بەردەوام بن.

 

لەبارەی سەقامگیریی عێراقەوە، سەرکۆنەی ئێرانی کرد و گوتی، "بە هەر نرخێک بێت، دەبێ ئاسایشی عێراق بپارێزرێت چونکە هێزێکی گرنگە بۆ ناوچەکە".

 

لای خۆیەوە، فواد حوسێن رایگەیاند، "بە دۆخێکی هەستیاردا تێدەپەڕین لە عێراق و ناوچەکەشدا. لەگەڵ وەزیری دەرەوەی فەرەنسا باسی هەڵبژاردنەکەی عێراقمان کرد کە ئێستا لایەنە سیاسییەکان سەرقاڵی پێکهێنانی حکومەتی نوێن".

 

هەروەها گوتی کە عێراق پشتیوانیی خۆی بۆ دانوستانی نێوان ئەمریکا و ئێران دەربڕیوە و "بە ئەرکی خۆمانی دەزانین ئاگری شەڕ دووربخەینەوە لە ناوچەکەمان".

 

"جەختمان لە رێککەوتنەکەی حکومەتی سووریا و هەسەدە کردەوە و لە شەڕی دژ بە داعش بەردەوام دەبین"، فواد حوسێن وای گوت.

 

هەر ئەمڕۆ وەزیری دەرەوەی فەرەنسا لە دیمەشق، لەگەڵ ئەسعەد شەیبانی، وەزیری دەرەوەی سووریا کۆبووەتەوە.