رێکخراوێکی ئەڵمانی: ساڵی رابردوو 110 کچی خوار 18 ساڵ لە هەولێر و رانیە خەتەنەکراون

 

پەیام ئەحمەد لە بەشی یاسایی رێکخراوی وادی ئاڵمانی لە هەولێر بە تۆڕی میدیایی رووداوی راگەیاند، ساڵی رابردوو سەردانی مەیدانیمان بۆ زۆربەی گوند، شار و شارۆچکەکان کرد و بۆمان دەرکەوت کە هێشتا لە کوردستان خەتەنەکردن بەردەوامە و زۆربەی خەتەنەکردنەکان لە گوند، گەڕەکەکانی دەوروبەر و سەنتەری شاری هەولێر بوون.

 

هاوکات هێرۆ ئەحمەد، چالاکڤان و سەرپەرشتیاری پڕۆژەکانی ژنان لە رێکخراوی نوێ لە هەڵەبجە ئاماژەی بەوە کرد، ساڵی 2021 لە هەڵەبجە سەردانی 54 گوندمان کردووە، گوند هەبووە پێنج جار پرسیار و لێکۆڵینەوەمان کردووە و بۆمان دەرکەوت بەپێچەوانەی ساڵانی رابردوو، 2019، ژمارەی خەتەنەکردنی کچان لە هەڵەبجە لە سفر نزیک بووەتەوە و دەتوانین بڵێین ئێستا هەڵەبجە خاڵییە لە خەتەنەکردن.

 

هێرۆ ئەحمەد هەروەها گوتی، بەپێی بەدواداچوونەکانیان لە گەرمیان رێژەکە "زۆر زۆر کەمیکردووە" و لەنێو سەنتەری شاری سلێمانیش ئامارێکی روون لەبەردەست نییە، "چونکە تیمەکانمان کەمتر لەوێ لێکۆڵینەوەیان کردووە."

 

چیمەن رەشید، چالاکڤان و بەڕێوەبەری رێکخراوی ژیندا بە رووداوی گوت، رێژەی خەتەنەکردن لە دهۆک لە ساڵی 2007 بە رێژەی %1 بوو، بەڵام ئێستا بەپێی ئەو شتانە دەیبیستین رێژەکە زیادیکردووە.

 

رێکخراوی وادی ئەڵمانی 31 ساڵە لە کوردستان کار دەکات و لە ساڵی 2004، بە راگەیاندنی کەمپەینی بەرەنگاربوونەوەی خەتەنەکردنی مێینە لە کوردستان کار بۆ هۆشیاری و نەهێشتنی خەتەنەکردنی کچان دەکات.